Jappaı ımmýndaý: Qyzylshaǵa qarsy 608 myń qazaqstandyq egildi

Elimizde qyzylsha ınfektsııasynyń taralýyna qarsy jappaı ımmýndaý júrip jatyr. Búginde qosymsha vaktsınalaýǵa jatatyn 1,5 mln adamnyń 608 myńnan astamy egildi, qamtý 40,5% qurady, dep habarlaıdy Kazinform.

Densaýlyq saqtaý mınıstrligi Sanıtarııalyq-epıdemıologııalyq baqylaý komıtetiniń málimetine súıensek, qosymsha ımmýndaý aıasynda kún saıyn 30 myńnan astam adam vaktsınalanady.

Qyzylshaǵa qarsy josparly vaktsınalaý da jalǵasyp jatyr. Máselen, jyl saıyn 1 jáne 6 jastaǵy 700 myńǵa jýyq bala egiledi (DDU usynǵan keminde 87,1% kezinde 1 jastaǵy balalardyń 94,1% jáne 6 jastaǵy balalardyń 93,4% qamtyldy).

Budan bólek, epıdemııalyq kórsetkishter boıynsha vaktsınatsııalaý júrgizilýde, buryn vaktsınatsııalaýdy ótkizip alǵan jáne odan bas tartqan 133,3 myńnan astam adam egildi.

«Qabyldanǵan sharalardyń arqasynda qazirgi ýaqytta elimizdiń kóptegen óńirinde qosymsha ımmýndaýdyń oń dınamıkasy baıqalady. Máselen, Mańǵystaý, Almaty, Aqtóbe, Jambyl, Túrkistan, Abaı, Ulytaý oblystarynda sońǵy aptada qyzylshadan qorǵaý maqsatynda balasyn egýge ákelip jatqan halyqtyń belsendiligi artty», - delingen vedomstvo málimetinde.

Densaýlyq saqtaý mınıstrligi qyzylshaǵa qatysty eldegi qolaısyz epıdemıologııalyq ahýalǵa baılanysty 5 jasqa deıingi balalardy qosymsha jappaı ımmýndaý sheńberinde egýdi usynady. Sondaı-aq 5 –18 jas aralyǵyndaǵy balalarda qyzylshaǵa qarsy 2 ekpe bolmaǵan jaǵdaıda profılaktıkalyq ekpe salýǵa keńes berilip otyr. Profılaktıkalyq ekpe alý úshin tek jumys kúnderi ǵana emes, demalys kúnderi de tirkelgen jeri boıynsha medıtsınalyq uıymǵa júginýge bolady.