Jappaı ereýilder kezinde zalal kelgen kásipkerlerge tólemaqy qashan beriledi
«Osy aptada barlyq óńirdegi palatanyń keńes jıyny ótedi. Ol jıynda 2 másele qarastyrylady. Birinshi, Atamekenniń bolashaq damýyna qatysty usynystar. Ekinshi, kásipkerlerdiń óz suraqtary, bıznesti qalaı damytamyz, kásipkerlerdiń Úkimetke qandaı usynys, suraqtary bar. 17 óńirde keńes ótken soń, jumys toby qurylady. Oǵan elimizdiń ár óńirinen 2 adamnan saılanady. Odan bólek, jumys tobyna qatysam degen sala mamandary men sarapshylar bolsa esik ashyq. Atalǵan jumys toby 1-1,5 aı boıy otandyq kásipkerlikti ilgeriletý ulttyq palatanyń jumysyn jetildirý jolyn izdeıdi. Jáne olardyń jumysy áleýmettik jeli arqyly ashyq jarııa etiledi», - dedi «Atameken» ulttyq kásipkerler palatasynyń basqarma tóraǵasy Abylaı Myrzahmetov Facebook paraqshasyndaǵy tikeleı efır barysynda.
Onyń aıtýynsha, Qazaqstanda kásipkerlikti damytýǵa arnalǵan usynystar palatanyń kezekti sezinde qaralady.
«Qańtar oqıǵasy kezinde kásipkerlikke aıtarlyqtaı zalal keldi. 1700-ge jýyq kásipkerlik nysan qırady, onyń 92 paıyzy Almaty qalasyna tıesili. Óz kezegimizde jedel jeli quryp, kásipkerlermen baılanysty bolyp, shuǵyl aqparat alyp otyrdyq. Bizdiń koll-ortalyqqa 10 myńnan astam aqparat kelip tústi. Onyń bárin Úkimetke tikeleı jetkizip otyrdyq. Sondaı-aq, biz Úkimetke bızneske kelgen shyǵyndy óteý jolyna qatysty naqty usynys berdik. Ol usynystardy Úkimet janynan qurylǵan arnaıy komıssııa qarap, bekitti. Jappaı tártipsizdikter kezinde bıznesine zalal kelgen jandar infokazakhstan.kz saıty arqyly ótinish qaldyra alady. Búginde saıt arqyly 195 ótinish kelip tústi, onyń 88 paıyzy Almatydan. Kásipkerlerdiń ótinishin qalalyq komıssııa qarap jatyr. Sondyqtan aldaǵy 1 aıdyń ishinde kásibine zııan kelgen jandar tólemaqy ala bastaıdy degen senimdemiz», - deıdi ol.
