Jappaı ereýilden keıin ustalǵan 200-den astam adamdy qamaǵan joqpyz - Sanjar Ádilov

NUR-SULTAN. QazAqparat – 200-den astam kúdiktige qoǵamnan oqshaýlaýmen baılanysty emes bultartpaý is-sharasy qoldanyldy. Bul týraly ІІM tergeý departamentiniń bastyǵy Sanjar Ádilov aıtty, dep habarlaıdy QazAqparat tilshisi.

«Іshki ister mınıstrligi ustalǵandardyń jeke basyn eskere otyryp, qylmystyq is júrgizý zańynda kózdelgen negizder boıynsha kúdiktilerdi qamaýdan bosatý jóninde de jumys júrgizýde. Ótken aptada qadaǵalaýshy prokýrormen kelise otyryp, 9 adamǵa qatysty bultartpaý sharasy - úı qamaǵyna, 6 adamdyki - eshqaıda ketpeý týraly qolhat alýǵa ózgertildi. Bul rette bosatylǵan adamdar tarapynan shaǵym túsken joq», - dedi ol ortalyq kommýnıkatsııalar qyzmetindegi brıfıng barysynda.

Onyń atap ótýinshe, keıbir kúdiktiler jasaǵan qylmysynyń jeńildigin eskere otyryp qamaýǵa alynbady.

Olarǵa qoǵamnan oqshaýlaýmen baılanysty emes bultartpaý sharasy qoldanyldy.

«Qazirgi ýaqytta qamaýǵa alynǵandardy qospaǵanda mundaı kúdiktilerdiń sany 200-den asady», - dedi Sanjar Ádilov.