Jappaı ereýilde urlyqpen ustalǵandardyń kópshiligi jastar boldy
«Tergeý materıaldary men nátıjesin taldaý kezinde bóten múlikti urlaǵany úshin ustalǵandardyń kópshiligi alǵash ret zań buzǵan jastar ekendigi anyqtaldy. Mundaı adamdarǵa tergeýshiler olardyń jeke basyn jáne oń minezdemesin eskere otyryp, bas bostandyǵynan aıyrýdan bólek shara qoldanady. Qazirgi kezde osy negiz boıynsha jáne kelgen zalaldy ótegen 326 kúdikti qamaýdan bosatyldy», - dedi Sanjar Ádilov ortalyq kommýnıkatsııalar qyzmetinde.
Qazirgi ýaqytta ishki ister organy tergeýshileriniń qaraýyndaǵy qylmystyq ister boıynsha 155 adam qamaýda otyr.
Onyń barlyǵy aýyr jáne asa aýyr qylmys jasady dep kúdikke ilingen.
Spıkerdiń aıtýynsha, tártipsizdik kezinde Almaty oblysynyń turǵyny «Tehnodom» saýda úıinen quny 1 mln teńgeden asatyn 2 teledıdar, shańsorǵysh jáne qar jınaıtyn mashınany urlaǵan.
Asyraýynda kámeletke tolmaǵan 2 balasy bar ekenin jáne zalaldyń ótelgenin eskere otyryp, tergeý satysynda kúdiktiniń bultartpaý sharasy qamaýdan úıqamaqqa ózgerdi.
Sondaı-aq, sot jeke minezdemesin, jasaǵan isine tolyq ókinip, kelgen zalaldy ótegenin eskere otyryp, onyń bas bostandyǵyn 2,5 jylǵa shektedi.
«Taǵy bir oqıǵaǵa toqtalsaq, bıylǵy 5 jáne 6 qańtarda Taldyqorǵan qalasyndaǵy jappaı tártipsizdik kezinde Almaty oblysynyń úsh týmasy «Fora» dúkeninen quny 1 mln teńgeden asatyn 8 uıaly telefon urlaǵan. Tergeý barysynda buryn sottalmaǵan eki kúdikti zalaldy ótegennen keıin bultartpaý sharasy úıqamaqqa ózgertildi, al urlyq úshin sottylyǵy bar úshinshi adam qamaýda qaldy. Qylmystyq isti sotqa jibergennen keıin, buryn sottalmaǵan eki adamnyń úsh jylǵa bas bostandyǵy shekteldi, al úshinshi sottylyǵy bar adam bas bostandyǵynan aıyryldy», - dedi Tergeý departamentiniń basshysy.
Budan buryn habarlanǵandaı, qańtar oqıǵasy kezinde 1 502 bıznes nysany tonaldy.
