Jappaı egis naýqany mamyr aıynyń ortasynan bastalady
ASTANA. KAZINFORM – 2024 jylǵy eginge 2,4 mln tonna tuqym qajet. Bul týraly Úkimet otyrysynda Aýyl sharýashylyǵy mınıstri Aıdarbek Saparov aıtty.
«Búgingi tańda elimizdiń ońtústik óńirlerinde egis jumystary júrgizilip jatyr. 33,3 myń gektarǵa dándi daqyldar, kókónis, azyqtyq, maıly (maqsary) daqyldar egildi. Jappaı egis naýqany osy jyldyń mamyr aıynyń ekinshi onkúndiginde bastalady. Kóktemgi egis jumystary jáne vegetatsııalyq kezeńde aýa raıy jaǵdaıy mańyzdy. Sonymen birge Qazgıdromettiń boljamdy derekterine sáıkes, eldiń ońtústigi men shyǵysyn qospaǵanda, respýblıkanyń kóp aýmaǵyndaǵy ylǵal qory ońtaıly. Fermerlerdiń qar ustaý jumystaryn júrgizgenin aıta ketý kerek. Alaıda, kóktemgi egis jumystarynyń basyna qaraı topyraqtaǵy naqty ylǵal qory kóktemniń qalaı bolatynyna qaraı aıqyndalatyn bolady. Sondyqtan tuqymdardy tańdaý, sebý merzimi, tyńaıtqyshtardy qoldaný, egý aldynda topyraqty óńdeý jáne basqa da qajetti is-sharalardan bastap barlyq agrotehnıkalyq is-sharalardyń ýaqtyly jáne durys júrgizilýine erekshe nazar aýdarý qajet», - dedi Aıdarbek Saparov.
Onyń atap ótýinshe, mańyzdy máselelerdiń biri - tuqymdyq materıalmen qamtamasyz etý. Oblystar ákimdikteriniń jedel derekteri boıynsha 2024 jylǵy eginge 2,4 mln tonna tuqym qajet, Osy jyldyń 26 naýryzyndaǵy derekke sáıkes, 97 paıyz tuqymdyq materıal bar.
«2024 jylǵa oblystardyń jergilikti bıýdjetterinde tuqym sharýashylyǵyn damytýdy sýbsıdııalaýǵa 12,8 mlrd teńge kózdelgen. Sonymen qatar, óńirlerge aýyl sharýashylyǵy daqyldarynyń elıtalyq tuqymdarynyń úlesi boıynsha jospar jetkizilgenin atap ótken jón. Ol osy jyly 9,4 paıyzdy qurady. Osyǵan baılanysty oblystar ákimdikteri bul máseleni baqylaýda ustaýy qajet», - dedi mınıstr.
