Jappaı egin oraǵy naýqanynyń bastalýy qyrkúıek aıynyń birinshi onkúndigine josparlanýda
«Astyq egetin negizgi oblystarda maýsymnyń birinshi bóliginde normadan tómen atmosferalyq jaýyn-shashyn men sýyq aýa-raıy baıqaldy. Astyq egetin oblystardyń kópshilik bóliginde maýsymnyń ekinshi jartysynda jáne shilde aıynda jaýǵan mol jaýyn-shashyn vegetatıvtik massanyń qalyptasýyna, dándi daqyldar damýynyń sozylýyna, jazdyq bıdaı egisterinde aýrýlardyń taralýyna jáne damýyna ákelip soqty. Aqmola, Qostanaı jáne Soltústik Qazaqstan oblystarynda shilde aıynda jaýyn-shashynnyń mólsheri normadan 2-3 ese artyp, bul bıik bıdaı sabaǵynyń qalyptasýyna, sonyń saldarynan jekelegen tanaptarda eginniń jatyp qalýyna áser etti», - dedi Qaırat Aıtýǵanov.
Onyń sózine qaraǵanda, jalpy alǵanda, maýsym jáne shilde aılarynda oń tıimdi temperatýralardyń jetkiliksizdigi baıqaldy. Ol dándi, maıly jáne dándi burshaqty daqyldardyń ósip-jetilýin shekteıdi. Egý merzimderine baılanysty eginniń damyp-jetilýiniń sozylýy maýsym aıynda jaýyn-shashyn norma sheginde bolǵan óńirlerde 5-7 kúndi, jaýyn-shashyn normadan 2-3 ese joǵary bolǵan óńirlerde 7-10 kúndi qurady.
«Osyny eskerip, aýa-raıynyń kópjyldyq tájirıbesine súıensek, tamyz aıynda egistiń damyp-jetilýden artta qalýshylyǵy saqtalatyn bolady jáne jappaı egin jınaýdyń bastalýy qyrkúıek aıynyń birinshi onkúndiginiń sońynda kútilýde. Tamyz aıynda aýa raıy ystyq bolǵan jaǵdaıda jappaı egin jınaýdyń bastalýy tamyz aıynyń sońy men qyrkúıek aıynyń basynda kútilýde», - dep atap ótti vıtse-mınıstr.
Aıta keteıik, «Qazgıdromet» RMK boljamy boıynsha tamyz aıynda aýanyń temperatýrasy kóp óńirlerde normadan joǵary jáne norma deńgeıinde, al jaýyn-shashynnyń mólsheri normanyń sheginde bolady dep kútilýde.