Japonııanyń júrdek poıyzdarynda qashyqtan jumys isteıtinderge arnaıy vagon jasaqtalmaq
TOKIO. QazAqparat – Japonııada Sınkansen júrdek poıyzdarynyń operatorlary sapar kezinde qashyqtan jumys isteıtin jolaýshylarǵa arnap erekshe jaǵdaı jasady. Bul týraly QazAqparat NHK-ge silteme jasap habarlaıdy.
Qazan aıynan bastap JR Tokai jáne JR West temirjol kompanııalary «Nadzomı» sýperekspresinde qashyqtan jumys isteıtin jolaýshylar úshin arnaıy bir vagondy beredi. Bul poıyzdar Tokıo, Osaka jáne Fýkýoka sııaqty qalalar arasynda qatynaıdy.
«Keıbir vagondarda tegin Wi-Fi qoldaný ýaqytyna shekteýdi alyp tastaıdy, symsyz sıgnaldar qaýipsizdikti qamtamasyz etý úshin kodtalady. Basqa qosymsha qyzmetter qatarynda derbes kompıýterge arnalǵan jumsaq demeýish, ekrandy bóletin qabyrǵa bar», - delingen habarlamada.
Sınkansenniń basqa marshrýtyndaǵy operatorlar da osyndaı qyzmetterdi synap jatqany aıtyldy.
NHK-diń aıtýynsha, mundaı sheshim koronavırýs pandemııasy jaǵdaıynda adamdardyń jumys kestesiniń ártúrli bolýyna baılanysty qabyldandy. Odan bólek, temirjol kompanııalary saparǵa shyǵatyn jolaýshylardy qaıtarý úshin qolǵa almaq, sebebi indet kezinde sınkansen jolaýshylary azaıyp ketken.
