Japonııanyń úsh prefektýrasynda koronavırýsqa baılanysty shekteýler kúsheıtiledi

TOKIO. Kyodo News –QazAqparat – Japonııa úkimeti Osaka, Hıogo jáne Mııagı prefektýralarynda ınfektsııanyń kúrt órshýine baılanysty koronavırýsqa qarsy qatań sharalar qoldaný týraly sheshim qabyldady, dep habarlaıdy QazAqparat Kyodo News-ke silteme jasap.

Sharalar, onyń ishinde jumys ýaqytyn qysqartý týraly uıǵarymdardy elemeıtin qoǵamdyq tamaqtaný oryndaryna salynatyn aıyppuldar 5 sáýirden bastap bir aı ishinde kúshine enedi.

«Bul sharalar koronavırýstyń taralýyn toqtatý jáne taǵy bir tótenshe jaǵdaı engizý qajettiligin boldyrmaý úshin qajet», - dep málimdedi premer-mınıstr Esıhıde Sýga.

Osakada beısenbide indetke shaldyǵýdyń 616 jańa jaǵdaıy anyqtalýyna baılanysty el úkimeti osyndaı sharalar qabyldaýǵa májbúr bolyp otyr. Bul – eki aıdan astam ýaqyt ishindegi eń joǵary kórsetkish. Tipti Tokıodaǵy kórsetkishten de asyp tústi, munda 475 jaǵdaı anyqtaldy. Al el astanasyndaǵy jazǵy Olımpıada oıyndaryna tórt aıdan az ýaqyt qaldy.

Koronavırýs juqtyrý jaǵdaılary Mııagıde de ósýde. Munda sársenbide aýrý juqtyrýdyń 200 jańa jaǵdaıy tirkelgen. Hıogoda da aýrýǵa shaldyǵýshylar sany artyp jatyr, onda 211 jaǵdaı anyqtaldy.

Meıramhanalar men barlar saǵat 20:00-ge deıin jabylady jáne ony saqtamaǵany úshin 200 000 ıen (1800 dollar) aıyppul salynýy múmkin. Kontsertter men sporttyq oıyndar sııaqty iri is-sharalarǵa kelýshilerdiń sany 5000 adamnan aspaýy tıis.