«Japonııanyń sulýlyq álemi» Astanaǵa keldi
ASTANA. QazAqparat - 23 qyrkúıek kúni QR Tuńǵysh Prezıdentiniń Mýzeıinde japondyq sýretshi Tomoko Hoýkenyń «Japonııanyń sulýlyq álemi» atty jeke kórmesi ashylady, dep habarlady mýzeıdiń baspasóz qyzmetinen.
Kórme, Mýzeıdiń «Mádenı úndesý» halyqararalyq jobasy aıasynda tarıhı sabaqtastyq, Qazaqstandaǵy Japonııa elshiligimen kóp jylǵy tabysty eńbektiń arqasynda uıymdastyrylyp otyr.
Tomoko Hoýke - japondyq klassıkalyq keskindemeniń izbasary jáne dástúrli japon kórkemóner mektebiniń mırasqory. «Nıhonga» keskindemesi (onyń dálme-dál aýdarmasy- japondyq keskindeme) - bul tásilder men janrlardy keń kólemde qamtıtyn Japonııanyń beıneleý óneriniń ejelgi jáne tańdaýly túrleriniń birden biri. VIII ǵasyrdan búgingi kúnge deıingi jazylǵan, ulttyq keskindemelerdiń barlyǵyn, búginde Japonııada «Nıhonga» sózimen ataıdy. Jalpy japon keskindemesine kúndelikti turmys pen jyldyń tórt mezgiliniń ózara tyǵyz baılanysy tán. Sondyqtan da japon mádenıetiniń ereksheligi bolyp kórinetin ádette tabıǵattyń sulýlyǵyn, maýsymnyń ár túrlerin, qustardy beıneleýi, Japonııada jyldyń tórt mezgiliniń aýysýy, kóptegen japondyq sýretshilerdiń óz jumystarynda aıqyn kórinis tapqan. Avtordyń oıynsha, qorshaǵan ortamen ózara tyǵyz baılanystaǵy olardyń ómirine, tabıǵattaǵy ózgerister, jahandyq jylylyqtyń paıda bolýy, japondyqtardyń dástúrli mádenı ómirindegi oqıǵalarǵa teris yqpal etedi. «...Sulý da ásem Japonııany saqtaý maqsatynda jáne japon keskindeme óneriniń barlyq mańyzdy ádisterin oryndaýdy túsine otyryp, men, japon mádenıetinde qalyptasqan dástúrlerge qurmetpen qaraıtyn sýretshiniń jolyn jalǵastyramyn...», - deıdi Tomoko Hoýke. «Japonııanyń sulýlyq álemi» kórmesi sýretshiniń qazaqstandaǵy alǵashqy kórmesi bolyp tabylady. Astana qonaqtary men turǵyndary, bir aı boıy ejelden qalyptasqan japondyq dástúrli mánerde oryndalǵan keskindemelermen tanysýdyń zor múmkindigine ıe bolady. 24 qyrkúıekte Tomoko Hoýke «Japonııanyń sulýlyq álemi» týraly óziniń túsinigi men tájirıbesin bólisý maqsatynda, Mýzeıdiń janyndaǵy Beıneleý óneri stýdııasynyń oqýshylaryna arnap sheberlik saǵatyn ótkizedi.
