Japonııanyń Parlament saılaýynda jeńilis tapqan 94 jastaǵy kandıdat kók tıynsyz qaldy
ASTANA. 17 jeltoqsan. QazAqparat - Parlament saılaýyna túsken 94 jastaǵy japondyq zeınetker ómir boıy jınaǵan aqshasyn saılaý naýqanyna salyp, kók tıynsyz qaldy, dep habarlaıdy Lenta.ru Agence France-Presse agenttigine silteme jasap.
Rekıtı Kavasıma Tokıonyń soltústiginde ornalasqan Saıtama qalasy atynan parlament saılaýyna qatysý úshin 3 mıllıon ıen (35,7 myń AQSh dollary) kepil salǵan bolatyn. Bul Ekinshi Dúnıejúzilik soǵys ardageriniń jerleýge dep saqtap kelgen qarajaty bolsa kerek. Óte belsendi naýqanǵa qaramastan, onyń kandıdatýrasy halyqtyń az daýysyn jınap, saılaýdan ótpeı qaldy.
Kavasımanyń ózi saılaýdaǵy sátsizdigine ókinish bildirmeıdi. «Samýraı qansha ash bolsa da, aqshaǵa elitpeýi tıis», - deıdi ol. Jerleýge qajetti qarjynyń joqtyǵy da eks-kandıdattyń kóńiline qaıaý túsirmegen syńaıly. Ol Fýdzı taýyndaǵy ný ormanda kóz jumýǵa daıyn ekendigin de málim etip úlgerdi.
Jeksenbide, 16 jeltoqsanda Japonııada ótken saılaýda eldiń burynǵy premer-mınıstri Sındzo Abeniń basqarýyndaǵy Lıberaldy-demokratııalyq partııasy jeńiske jetti. 2006 men 2007 jyldary úkimet basynda bolǵan Abe qatań syrtqy saıasatty qoldaýda.
