Japonııanyń krýız laınerinde koronavırýs juqtyrǵandar sany 70-ke jetti
TOKIO. QazAqparat – Japonııanyń Densaýlyq saqtaý mınıstrligi jeksenbi kúni Iokogamada karantınde turǵan krýız kemesinde taǵy alty adam koronavırýs juqtyrǵanyn málimdedi. Osylaısha borttaǵy indetti juqtyrǵandardyń jalpy sany 70-ke jetti. Bul týraly QazAqparat Kyodo-ǵa silteme jasap habarlaıdy.
Densaýlyq saqtaý, eńbek jáne áleýmettik qamsyzdandyrý mınıstrliginiń málimetine sáıkes, 20-dan 70 jasqa deıingi bes ekıpaj múshesi men bir jolaýshynyń – tórt fılıppındik, amerıkalyq pen ýkraındyqtan ótkir indet belgileri baıqalmaıdy.
Mınıstrlik kemedegi 3700 jolaýshy men ekıpaj músheleri ishindegi indet juqtyrýy múmkin 336 adamnyń analız tapsyrǵanyn málim etti. Zertteý nátıjesi taǵy 6 jolaýshynyń koronavırýs juqtyrǵanyn anyqtady.
50 elden jolaýshylary bar keme dúısenbiden beri karantınde tur. Oǵan jolaýshylardyń biriniń Gonkongta jaǵalaýǵa shyǵyp, pnevmonııany týdyratyn koronavırýs juqtyrǵany sebep boldy.
Japonııada jańa vırýsty juqtyrǵandardyń jalpy sany 96 adamdy quraıdy. Onyń 10-y Ýhan qalasynan charterlik reısterden evakýatsııalanǵan. Taǵy 16-sy – týrıster men týrıstik avtobýstyń júrgizýshisi.
60 jastaǵy Japonııa azamaty senbi kúni Ýhan qalasynda kóz jumdy. Oǵan koronavırýs sebep bolýy múmkin. Eger kúdik rastalsa Japonııada vırýstan bolǵan alǵashqy ólim tirkelmek.
Jeksenbi kúni Gonkong portyndaǵy birneshe kúndik karantınnen keıin 3600 jolaýshy men ekıpaj múshelerine World Dream krýızdik kemesinen ketýge ruqsat berildi.
