Japonııanyń Qazaqstandaǵy elshisi Semeı mektepterin aralady
SEMEI. QazAqparat- Semeıge Japonııanyń Qazaqstandaǵy Tótenshe jáne ókiletti elshisi Tatsýhıko Kasaı keldi, dep habarlaıdy QazAqparat.
Aımaqqa sapary barysynda Tatsýhıko Kasaı Semeıdiń əkimi Ermak Sálimovpen kezdesti. Óz kezeginde ákim qala qonaǵyna qalanyń tarıhy men kórneki jerleri týraly aıtyp, Semeı mektepteri úshin kórsetip jatqan kómek úshin alǵys bildirdi.
Óıtkeni qalada birneshe jyl «Kornı travy» áleýmettik jobasy iske asýda. Atadmysh joba aıasynda 11 bilim berý mekemesiniń jóndeý jumystaryna qarjylyq kómek kórsetildi. Mysaly qaladaǵy №23 mekteptiń 195 terezesi, №25 mektepte 209, al №3 mektepte 241 eskirgen tereze aýystyryldy. Elshi atalǵan mektepterge at basyn arnaıy buryp, atqarylǵan jumys barysymen tanysty.
Tatsýhıko Kasaı óz sózinde áleýmettik jobanyń Semeıde ary qaraı júzege asatynyn aıtty.
"Bizdiń jobanyń kómegi tıip jatqanyna men óte qýanyshtymyn. Sebebi, oqýshylar jaıly synyptarda bilim alyp jatyr. Sondyqtan aldaǵy ýaqytta da joba óz jumysyn jalǵastyrady", - dedi Japonııanyń Qazaqstandaǵy Tótenshe jáne ókiletti elshisi Tatsýhıko Kasaı.
Aıta ketý kerek, 22 jyldyń ishinde japonııalyq tarap elimizde atalmysh joba sheńberinde 100 áleýmettik jobany iske asyrsa, sonyń 24-i shyǵys óńirine tıesili.
