Japonııanyń Goı qoryna «Altyn adamnyń» dálme-dál kóshirmesi syıǵa tartyldy
ASTANA. QazAqparat - Búgin QR Tuńǵysh Prezıdenti - Elbasy qory men Japonııanyń Goı beıbitshilik qory arasynda yntymaqtastyq týraly memorandýmǵa qol qoıyldy. Qujatty Elbasy qorynyń dırektory, Senat depýtaty Darıǵa Nazarbaeva men Goı beıbitshilik qorynyń prezıdenti Hıroo Saıondjı rásimdedi, dep habarlaıdy QazAqparat tilshisi.
«Qazaqstan Prezıdenti Nursultan Nazarbaev ózińizben áńgimelesý barysynda Goı beıbitshilik qory bizdiń elimizdegi bilim berý, ǵylym jáne mádenıet salalarynda birqatar jobany júzege asyratyndyǵyna senim bildirgen edi. Jáne de izgilik pen beıtishilik qundylyqtaryn ilgeriletý múddesine oraı birlesken jobalardy damytýǵa daıyn ekendigin bildirdi. Búgin memorandýmǵa qol qoıýymyz bizdiń maqsattarymyzdy júzege asyrý jolyndaǵy alǵashqy qadam bolatyndyǵyna senimim mol. Goı beıbitshilik qory barlyq qazaqstandyq úshin óte qyzyqty. Onyń óte qyzyqty ári uzaq jyldarǵy tarıhy bar. Ol BUU janyndaǵy úkimettik emes uıymnyń joǵary mártebesine ıe jáne bizdiń únimizge álemdik qoǵamdastyq qulaq túredi dep senim artamyz», - dedi saltanatty rásim barysynda QR Tuńǵysh Prezıdenti - Elbasy qorynyń dırektory, QR Parlamenti Senatynyń depýtaty Darıǵa Nazarbaev.
Sonymen qatar ol Elbasy qory Goı qorymen birlesip. Jas talanttardy qoldaý úshin ǵylym, mádenıet salalaryndaǵy jobalardy júzege asyrýǵa, sarapshylardyń dóńgelek ústelderin ótkizýge daıyn ekendigin basa aıtty.
Qazaqta «Beıbitshilik - turaqtylyq kepili» degen maqal bar jáne bizdiń uıymdarymyz osy qundylyqtarǵa saı jumys isteıdi. Prezıdent Nursultan Nazarbaev ıadrolyq qarý men ózge de kez kelgen basqynshylyqtardyń eń jaqsy qorǵanysy senim degen bolatyn. Bizdiń birlesken jumystarymyz bir-birimizge, álemdik qoǵamdastyqtyń bizdiń elderimizge senimin nyǵaıtýǵa baǵyttalatyndyǵyna senimdimin. Al senim jeke baılanys barysynda týyndaıdy», - dedi qor dırektory.
Óz kezeginde Hırro Saıondjı eki qordyń áleýmettik mańyzy bar bastamalardy júzege asyrý barysnyda ózara tájirıbe almasýy mańyzdy ekendigin basa aıtty. Sonymen qatar birlesken sharalardy uıymdastyrýǵa jáne ótkizýge daıyn ekendigin jetkizdi.
Memorandýmǵa qol qoıý rásimi aıaqtalǵannan keıin QR Tuńǵysh Prezıdenti - Elbasy qorynyń atqarýshy dırektory Qanat Jumabaev Goı beıbitshilik qoryna Qazaqstannyń nyshany, Uly dala eliniń mádenı murasy sanalatyn «Altyn adamnyń» dálme-dál kóshirmesin syıǵa tartty.
