Japonııanyń «Fýkýsıma-1» AES-inde radıoaktıvti sý syrtqa aqty
ASTANA. QazAqparat - Japondyq mamandar apatty "Fýkýsıma-1" AES aýmaǵynda jer ústinde ornalasqan suıyqtyq saqtaıtyn qoımadan radıoaktıvti zattardyń joǵary mólsheri bar sýdyń aǵyp ketkenin anyqtady, dep habarlaıdy QazAqparat TASS aqparattyq agenttigine silteme jasap.
Stansy operatory Tokyo Electric Power (TEPCO) kompanııasynan málim etkendeı, aqqan suıyqtyq kólemi 32 lıtrdi, al ondaǵy beta-sáýlelegish zattardyń quramy 1 lıtr sýǵa 590 myń bekkereldi qurady. Teńizge jiberýge ruqsat etiletin negizgi norma 1 lıtr sýǵa 150 bekkerel. Apat saldaryn joıý úshin TEPCO qyzmetkerleri radıoaktıvti suıyqtyqtyń bir bóligin sý qoımalarynyń birinen ekinshisine aıdaǵan.
Aıta keteıik, qazirgi ýaqytta "Fýkýsıma-1" aýmaǵynda radıoaktıvti suıyqtyqtyń aǵýy men jerasty sýlarynyń zaqymdanýynyń aldyn alý úshin topyraqty qatyrý jumystary júrgizilýde. Memlekettik bıýdjetten baǵdarlamaǵa 32 mlrd. ıena kóleminde (shamamen $318 mln) qarjy bólindi. "Fýkýsıma-1" AES-te apat 2011 jyly naýryz aıynda oryn alǵan edi. Tsýnamı saldarynan stansynyń energııa jáne salqyndatý júıeleri isten shyqqan bolatyn.
