Japonııany topan sý basyp, 670 myńdaı adam evakýatsııalandy
TOKIO. KYODO - QazAqparat – Sársenbiniń tańynda Japonııanyń ońtústik-batysynda bastalǵan nóser tolassyz jaýdy. Ózender arnasynan tası bastaǵan soń jergilikti bıliktiń júzdegen myń adamdy qaýipsiz jerge kóshirýine týra keldi, dep habarlaıdy QazAqparat Kyodo agenttigine silteme jasap.
Japonııa Meteorologııa agenttigi ólkede buryn-sońdy mundaı nóser jaýǵan emes dep málimdedi.
Topan sý kem degende bir adamnyń ómirin qıdy. Kıýsıý aralynyń teriskeıine oryn tepken Takeo qalasynda shaǵyn kólikti sý aǵyzyp ketip, ishindegi er adam jazym bolǵan. Takeoǵa kórshiles otyrǵan Saga qalasynda da bir áıel mingen kólikti sý aǵyzyp ketti degen habarlar tarap jatyr.
Budan bólek, polıtsııa Fýkýoka prefektýrasynyń ıAme qalasynda da bir adam qurban bolýy múmkin dep otyr.
Fýkýoka, Saga jáne Nagasakı prefektýralary 669 000 myń adamdy evakýatsııalaýǵa sheshim qabyldady. Atalǵan prefektýralardyń kóp bóliginde joldar jabylyp, poıyz qatynasy toqtaǵan.
Búgin tańerteń Saga qalasynda 110 mm jańbyr jaýǵan.
Sınoptıkter aldaǵy kúnderi Kıýsıý aralyndaǵy jaýyn-shashyn mólsheri 200 mm-ge deıin, al Tokıo jáne Sıdzýoka prefektýralarynda 180 mm-ge jetetinin aıtyp, dabyl qaǵýda.
