Japonııanyń joǵary jyldamdyqty poıyzdary jańa sándi qyzmet túrin usynady
ASTANA. KAZINFORM — Japonııa ushaqtaǵydaı jeke kýpeleri bar «Supreme Class» qyzmetin joǵary jyldamdyqty poıyzdarda iske qosady, dep habarlaıdy Euronews.
Jyldamdyǵy, jaılylyǵymen tanymal japondyq sınkansen joǵary jyldamdyqty poıyzdary budan da yńǵaıly bola túspek. Osy jyldyń kúzinen bastap jolaýshylar esigi bekitiletin, jaıylatyn oryndyqtary jáne jeke Wi-Fi jelisi bar bólek kýpelerge tapsyrys bere alady.
Japonııanyń áıgili joǵary jyldamdyqty poıyzdary jańa sándi qyzmet túrin engizip jatyr.
1 qazannan bastap jolaýshylarǵa jeke kýpeler usynylady.
Ushaqtyń birinshi klasyna uqsas bul kýpeler qyzmet iske qosylǵan sátten bastap kúnine shamamen 12 poıyzda qoljetimdi bolady. Al jyl sońyna deıin olardyń sany táýligine 30 poıyzǵa deıin kóbeımek.
Central Japan Railway Company jáne West Japan Railway Company 2028 jyldyń sońyna qaraı «Supreme Class» kýpeleri Tokaıdo jelisi boıynsha qatynaıtyn barlyq sınkansen poıyzdynyń shamamen 30 paıyzynda paıda bolatynyn málimdedi.
Jańa kýpeler qandaı bolady?
«Supreme Class» keńistiginiń eki túrli nusqasy usynylady.
Birinshi nusqa dıvan jáne keńirek orynmen jabdyqtalady ári eki jolaýshyǵa deıin eseptelgen. Ekinshi nusqa yqshamdaý bolyp, jalǵyz saıahattaıtyn jolaýshylarǵa arnalǵan.
Yqsham kýpeler Tokıo men Nagoıa arasyndaǵy «Nodzomı» sınkansen poıyzdarynda qoljetimdi bolady. Bir baǵyttaǵy bılet quny 32 440 ıen (shamamen 176 eýro).
Al sol baǵyttaǵy keńirek kýpeniń baǵasy 47 060 ıen (shamamen 255 eýro) bolady. Ekinshi jolaýshyǵa qosymsha negizgi bılet pen jedel poıyz bıletin satyp alý qajet.
Baspasóz máslıhatynda JR Central prezıdenti Sıýnsýke Nıva jańa qyzmettiń iske qosylýy «joǵary deńgeıdegi qyzmet kórsetýdi kútetin klıentterge úzdik servısti usynýǵa múmkindik beretinin» aıtty.
Kompanııa sondaı-aq kelesi jyldyń sáýirinen bastap joǵary jyldamdyqty poıyzdarda jyljymaly qulyptalatyn esikteri bar jartylaı jeke kýpelerdiń de paıda bolatynyn habarlady. Degenmen olar tolyq jabyq keńistik bolmaıdy, kerisinshe bıik qalqalary men keńirek jeke aımaǵy bar oryndar túrinde usynylady.
Kreslolardyń qurylymy arnaıy jasalǵan: oryndyqty shalqaıtqan kezde onyń syrtqy qabyǵy artynda otyrǵan jolaýshyǵa kedergi keltirmeıdi.
Aıta ketelik Japonııa halyqaralyq týrıstik salyqty 3000 ıenge deıin kóteretini týraly jazǵan edik.
