Japonııanyń úkimet quramynda aýys-túıis bolady
ASTANA. KAZINFORM — Japonııa premer-mınıstri Sanae Takaıtı josparlaǵan úkimettegi kadrlyq ózgerister 17 qyrkúıekte ótedi. Al kelesi kúni bıliktegi Lıberaldyq-demokratııalyq partııanyń basshylyǵynda ózgerister bolady, dep habarlaıdy TASS.
Sońǵy málimetterge sáıkes, úkimet quramyna alǵash ret Tosıharý Fýrýkava kirýi múmkin. Al Lıberaldyq-demokratııalyq partııada parlamentpen jumys jónindegi komıtet tóraǵasy qyzmetin Hıdekı Mýraı atqarýy yqtımal.
Qazirgi úkimettegi kóptegen basshy qyzmetterin saqtap qalady dep kútiledi. Olardyń qatarynda partııany is júzinde basqarýda mańyzdy ról atqaratyn LDP bas hatshysy Sıýnıtı Sýdzýkı de bar. Ol lıberal-demokrattar arasynda yqpaly zor Taro Asonyń áıeliniń aǵasy. Aso 2025 jyly Takaıtıdiń partııa jetekshisi ári premer-mınıstr bolyp saılanýyna belsendi túrde qoldaý kórsetken. Onyń qoldaýy Takaıtıge 2027 jylǵy saılaýda da qajet.
Buǵan deıin habarlanǵandaı, Takaıtı 2025 jylǵy aldyńǵy saılaýda ózine básekeles bolǵan saıasatkerlerdi joǵary laýazymdarda qaldyrýdy kózdep otyr. Olardyń qatarynda Qorǵanys mınıstri Sındzıro Koıdzýmı, Syrtqy ister mınıstri Tosımıtsý Motegı, Ákimshilik ister jáne kommýnıkatsııalar mınıstri Esımasa Haıası jáne LDP saıası keńesiniń tóraǵasy Takaıýkı Kobaıası bar.
Olar 2027 jyly qazirgi premer-mınıstrge eleýli básekelestik tanyta alady. Alaıda sarapshylardyń pikirinshe, burynǵy qarsylastaryn partııa basshylyǵynda qaldyrý olardyń áreketin shekteýi múmkin. Tipti bul Takaıtıdiń balamasyz negizde qaıta saılanýyna ákelýi yqtımal.
Aıta keteıik, buǵan deıin Japonııa valıýta baǵamyn ustap turýǵa eki aıda rekordtyq 15,4 trln ıena jumsaǵanyn jazǵanbyz.
