Japonııanyń soltústiginde qalyń qar jaýdy
ASTANA.KAZINFORM - Japonııanyń Hokkaıdo araly aımaqtyq bıliginiń málimetinshe, araldyń shyǵys aımaqtarynda 12 saǵat ishinde 1,29 metrge deıin qar jaýǵan, dep jazady BILD.
Qalyń qar saldarynan qoǵamdyq kólikter toqtap, joldar jabylyp qaldy. Turǵyndarǵa asa qajet bolmasa úılerinen shyqpaýǵa keńes berildi.
Ásirese qar basyp qalǵan Obıhıro qalasynda jaǵdaı qıyn boldy. Araldaǵy 370 mektep jabylyp, barlyq qoǵamdyq kólik qozǵalysy toqtatyldy. Adamdardy jol júrýden bas tartýǵa, al dalaǵa shyǵýǵa májbúr bolǵan jaǵdaıda ózderimen birge azyq-túlik pen jyly kıim alyp shyǵýǵa keńes berildi.
Meteorologtar qarly borannan qar kóshkini júrýi múmkin ekenin eskertedi. Joldardaǵy jaǵdaı da kúrdeli – kólikter qar qursaýynda qalyp, kóshelerdi tazalaý úshin aýyr tehnıkalar jumyldyryldy.
Buǵan deıin Japonııada mega jer silkinisiniń bolý yqtımaldyǵy 80%-ǵa deıin óskeni habarlanǵan bolatyn.
Aıta keteıik, 13 qańtarda Japonııanyń ońtústik-batysynda 6,4 baldyq jer silkinisi boldy.