Japonııanyń Osaka qalasynda jasóspirimder arasynda janjal týyndap, bir bala mert boldy
ASTANA. KAZINFORM - Japonııanyń batysyndaǵy Osaka qalasynyń ortalyǵynda senbi kúni keshke pyshaqpen jasalǵan shabýyl saldarynan 17 jastaǵy jasóspirim mert bolyp, taǵy eki bozbala jaraqat aldy.
Bul týraly jergilikti buqaralyq aqparat quraldary habarlady.
Kyodo News agenttiginiń málimetinshe, jergilikti polıtsııaǵa túngi saǵat 23:55 shamasynda qalanyń eń adam kóp jınalatyn saýda aımaqtarynyń biri — Dotomborı aýdanyndaǵy ǵımarattyń birinshi qabatynda pyshaqpen shabýyl jasalǵany týraly jedel habarlama túsken.
Oqıǵa orny qala ortalyǵynda, tamaqtaný oryndary shoǵyrlanǵan aýmaqta ornalasqan. Shabýyl jasady degen kúdikke ilingen jas jigit qashyp úlgergen jáne ázirge bostandyqta júr.
Polıtsııanyń málimetinshe, mert bolǵan jasóspirim Nara prefektýrasynyń turǵyny. Ol keýde tusynan jáne denesiniń ózge bólikterinen pyshaq jaraqatyn alyp, oqıǵa ornynda kóz jumǵan. Taǵy eki 17 jastaǵy jasóspirim aýrýhanaǵa jetkizilgen.
Quqyq qorǵaý organdarynyń dereginshe, shabýyl jasaǵan adamnyń jasy shamamen jıyrmanyń ústinde bolǵan jáne ol úsh jábirlenýshini tanyǵan. Qandy oqıǵaǵa deıin olardyń arasynda janjal shyqqany da belgili boldy.
Osyǵan deıin Gambýrgte pyshaqpen qarýlanǵan áıeldiń 12 adamdy jaraqattaǵany týraly jazdyq.
