Japonııanyń ońtústik-batysynda 34 kúnde 2 209 jer silkinisi tirkeldi

ASTANA. KAZINFORM — Japonııanyń ońtústik-batysyndaǵy Tokara arhıpelagynda sońǵy 34 kún ishinde ártúrli magnıtýdaly 2 209 jer silkinisi boldy, dep jazady Anadoly.

Japonııa Meteorologııa agenttiginiń (JMA) málimetinshe, Kagosıma prefektýrasyna qarasty bul arhıpelagta bir aıdan astam ýaqyt boıy seısmıkalyq belsendilik toqtamaı tur.

2024 jylǵy 21 maýsym men 24 shilde aralyǵynda araldar mańynda magnıtýdasy 1-den 6-ǵa deıingi silkinister boldy.

Atalǵan jer silkinisterinen qaza tapqandar, jaraqat alǵandar nemese zardaptar týraly aqparat tirkelmegen.

JMA málimdemesinde aımaqtaǵy kúshti taıfýndarǵa baılanysty jerdiń bosap, kóshkin qaýpi artýy múmkin ekeni aıtylyp, turǵyndardy barynsha saq bolýǵa shaqyrdy.

Seısmıkalyq belsendilik báseńdep keledi

NHK memlekettik telearnasynyń habarlaýynsha, JMA ókili Kıemoto Sınchı seısmıkalyq belsendiliktiń báseńdeı bastaǵanyn, biraq jer qyrtysynyń qozǵalysy jalǵasyp jatqanyn málimdegen.

— Jer silkinisteri kenetten kúsheıýi múmkin, sondyqtan aldaǵy jaǵdaıǵa boljam jasaýǵa áli erte, — dedi ol.

2023 jyldyń qyrkúıeginde Tokara arhıpelagynda 346 jer silkinisi, al 2021 jyldyń jeltoqsanynda 308 silkinis tirkelgen bolatyn.

Aýmaǵy 100 sharshy shaqyrymdy quraıtyn Tokara arhıpelagy 7 negizgi araldan turady. Maýsym aıyndaǵy málimetke sáıkes, onda 379 úıde shamamen 670 adam turady.

Buǵan deıin habarlanǵandaı, Japonııa parlamentiniń joǵarǵy palatasyna saılanǵan áıelderdiń rekordtyq sany tirkeldi.