Japonııanyń ınjınırıng kompanııasy Qatardaǵy jumystaryn qaıta jandandyrmaq
ASTANA. KAZINFORM - Taıaý Shyǵysta eki aptalyq bitim jarııalanǵannan keıin Katardaǵy gaz jobalarynda jumys isteıtin sheteldik merdigerler qyzmetin qaıta bastaý múmkindigin baǵalap jatyr, dep habarlaıdy Kazinform agenttiginiń menshikti tilshisi.
Japonııanyń ınjınırıng-qurylys kompanııasy Chiyoda Qatardaǵy suıytylǵan tabıǵı gaz óndiretin zaýyttaǵy qurylys jumystaryn qaıta bastaý jospary baryn málimdedi. Kompanııa qyzmetkerleri dron shabýylynan keıin Ras-Laffan ındýstrııalyq qalasyndaǵy nysandar aýmaǵynan evakýatsııalanǵan bolatyn.
Bıyl naýryz aıynda Ras-Laffandaǵy drondar men zymyrandar shabýylynan soń jumystar toqtap, aýqymdy suıytylǵan tabıǵı gaz eksporttyq keshenin keńeıtý jobasynyń iske qosý merzimi shegerildi. Bul jobaǵa merdiger retinde Chiyoda kompanııasy da qatysady. Jobany iske qosý osy jyldyń sońyna josparlanǵan edi.
Naýryz aıynyń basynda álemdegi eń iri gaz jetkizýshilerdiń biri — QatarEnergy dron shabýyldary saldarynan suıytylǵan tabıǵı gaz óndirisi toqtatylǵanyn habarlaǵan. Keıin kompanııa gaz jetkizilimderi boıynsha fors-major jarııalady.
Kompanııa basshylyǵy ınfraqurylymǵa keltirilgen zalaldy qalpyna keltirý bes jylǵa deıin sozylýy múmkin ekenin málimdedi.
Buǵan deıin Iran Donald Tramp soqqylardy toqtatý týraly málimdeme jasaǵannan keıin eki aptalyq bitimge keliskeni habarlanǵan bolatyn.
Qasym-Jomart Toqaev Taıaý Shyǵystaǵy bitim týraly kelisimdi quptady.
