Japonııanyń eń iri úsh banki kıberqaýipsizdik úshin Anthropic JI-in paıdalanady
ASTANA. KAZINFORM — Japonııanyń iri bankteri kıberqaýipsizdikti nyǵaıtý jáne qarjylyq ınfraqurylymyna kıbershabýyldardyń aldyn alý úshin amerıkalyq Anthropic kompanııasynyń jasandy ıntellekt tehnologııalaryn qoldanady.
BBC málimetine súıensek, jańa Claude Mythos jasandy ıntellekt modeline eldiń úsh iri banki — MUFG Bank, Sumitomo Mitsui Banking Corporation jáne Mizuho Bank qol jetkize alady.
Claude Mythos jasandy ıntellekt modeli bank júıelerindegi osal tustardy anyqtaý jáne hakerlik shabýyldarǵa tózimdilikti arttyrý quraly retinde qarastyrylyp jatyr.
Habarlanǵandaı, Japonııa men AQSh kıberqaýipsizdik salasynda yntymaqtastyq aıasynda JI engizý múmkindigin talqylady. Eki eldiń bıligi qarjy sektoryna baǵyttalǵan qaýipterge tez áreket etý qajettigin atap ótti.
Sáýirde tanystyrylǵan Claude Mythos modeli jasandy ıntellekt salasyndaǵy eń ozyq jobalardyń biri retinde ındýstrııanyń nazaryn aýdarǵan. Degenmen sarapshylar mundaı júıeler osal tustardy izdeý jáne paıdalaný úshin de qoldanylýy múmkin ekenin eskertedi.
Buǵan deıin modelge qoljetimdilik iri tehnologııalyq kompanııalar men jeke qarjy uıymdarymen shektelgen. Aldyn ala testilerde júıe myńdaǵan yqtımal mańyzdy osaldyqtardy anyqtaǵan.
Sonymen qatar, Japonııanyń qarjy qyzmetteri agenttigi, Japonııa banki jáne bankter sektory ókilderi kıberqaýipsizdik sharalaryn úılestirý úshin jumys tobyn qurýdy talqylap jatyr. Alǵashqy otyrys jaqyn arada ótýi múmkin.
Eske salaıyq, Google jasandy ıntellekt arqyly jasalǵan hakerlik shabýyldar jahandyq qaýipke aınalyp otyrǵanyn málimdedi.
