Japonııanyń eks-premeri Tomııtı Mýraıama qaıtys boldy
ASTANA. KAZINFORM — Japonııanyń burynǵy premer-mınıstri Tomııtı Mýraıama 101 jasynda dúnıeden ótti. Bul týraly Kıodo Tsýsın agenttigi habarlady, dep jazady Sınhýa.
Tomııtı Mýraıama 1924 jyldyń 3 naýryzynda Oıta prefektýrasynda dúnıege kelgen. Ol 1993 jyly Japonııanyń sotsıalıstik partııasynyń tóraǵasy bolyp saılanyp, 1994 jylǵy maýsymnan 1996 jylǵy qańtarǵa deıin premer-mınıstr qyzmetin atqardy.
1995 jylǵy 15 tamyzda ol mınıstrler kabınetiniń maquldaýymen Ekinshi dúnıejúzilik soǵystyń aıaqtalǵanyna 50 jyl tolýyna arnalǵan málimdeme jasady. Málimdemede Japonııanyń «qate ulttyq saıasattyń nátıjesinde soǵysqa bet alǵany», sonymen qatar óz otarshyldyq bıligi men agressııasy arqyly ásirese azııalyq elderdiń halyqtaryna úlken zııan men azap ákelgeni aıtyldy.
2000 jyly saıasattan ketkennen keıin de ol beıbitshilik isin nasıhattaýdy jalǵastyrdy.
2020 jylǵy 15 tamyzda málimdemesiniń 25 jyldyǵynda ol tarıhı shyndyqty moıyndaýdyń mańyzdylyǵyn taǵy da atap ótti.
Tomııtı Mýraıama óz málimdemesiniń Japonııa, Azııa jáne búkil álemde tatýlyq, beıbitshilik pen damý jolyndaǵy qyzmetin jalǵastyratynyna úmit bildirdi.
Eske salsaq, jaqynda Japonııanyń burynǵy ekonomıkalyq qaýipsizdik mınıstri Sanae Takaıtı bıleýshi Lıberaldyq-demokratııalyq partııanyń jańa tóraıymy bolyp saılandy.