Japonııanyń azamattyǵyn alý úshin elde turý merzimi eki esege artty
ASTANA. KAZINFORM — Japonııa úkimeti azamattyq alý talaptaryn qatańdatyp, natýralızatsııa úshin eń tómengi turý merzimin bes jyldan on jylǵa deıin ulǵaıtyp otyr, dep habarlaıdy Kyodo.
Jańa talaptar 1 sáýirden bastap kúshine enedi.
Japonııa Ádilet mınıstrliginiń habarlaýynsha, mindettemelerdiń oryndalýyn tekserý merzimi de uzartyldy. Mysaly, salyq tólemderi sońǵy bir jyl ornyna bes jylǵa baǵalanatyn bolady, al áleýmettik saqtandyrý jarnalary bir jyl ornyna eki jyl qaralady. Ózgerister buryn berilgen ótinishterge de qatysty.
Bul sheshim Japonııa premer-mınıstri Sanae Takaıtı tapsyrmasymen qabyldandy, ol buǵan deıin qoldanystaǵy erejelerdi jetkiliksiz qatań dep sanap, olardy kúsheıtý qajettigin aıtqan edi.
Qoldanystaǵy zańnamaǵa sáıkes, azamattyq alý úshin basty sharttardyń biri — elde úzdiksiz 5 jyldan kem emes turý, turaqty tabys kóziniń bolýy jáne minez-qulyq normalaryn saqtaý. Ótinishter qarastyrylǵan kezde Japonııa qoǵamyna ıntegratsııa deńgeıi, sonyń ishinde til meńgerý de esepke alynady.
Úkimettiń habarlaýynsha, turý merzimin uzartý ótinish berýshilerdiń elde beıimdelýin muqııat baǵalaýǵa baǵyttalǵan.
Mınıstrlik derekteri boıynsha, 2025 jyly azamattyq alý úshin 14 103 adam ótinish bergen, olardyń 9 258-i maquldanyp, 666-synan bas tartylǵan.
Buǵan deıin Japonııa 74 eldiń týrısteri úshin kirý tártibin onlaın júıe arqyly jeńildetetinin habarladyq.
