Japonııanyń 41 prefektýrasynda aptap ystyqqa baılanysty eskertý jarııalandy
ASTANA.KAZINFORM - Japonııadaǵy aptap ystyq 41 prefektýrada eskertý jarııalanýyna jáne el boıynsha júzdegen adamnyń aýrýhanaǵa jatqyzylýyna sebep boldy, dep habarlaıdy Anadolu agenttigi.
Basylymnyń habarlaýynsha, japondyq meteorologııalyq agenttik elde qalyptasqan aptap ystyqqa baılanysty 41 prefektýrada jylý soqqysynyń qaýpi týraly eskertý taratqan. Bul týraly NHK telearnasy jańbyrly maýsym aıaqtalǵannan keıin málimdeme jasaǵan japondyq meteorologııalyq agenttikke silteme jasap habarlady.
Birqatar aýdanda aýa temperatýrasy rekordtyq deńgeıge jaqyndady. Mıe prefektýrasynyń Kývana qalasynda termometr baǵany 40,5 gradýsqa deıin, Hamamatsýda (Sıdzýoka prefektýrasy) 40,1 gradýsqa deıin kóterildi. Basqa kóptegen eldi mekende temperatýra 39 gradýstan asty.
Turǵyndarǵa deneniń qyzyp ketýiniń saldaryn boldyrmaý úshin qaýipsizdik sharalaryn saqtaý kerektigi týraly eskertildi. Sarapshylar uzaq ýaqyt ashyq kún astynda bolmaýǵa jáne suıyqtyq mólsherin únemi toltyryp otyrýǵa keńes berdi.
Tokıo órt sóndirý basqarmasy aptap ystyqta Japonııada 287 adam aýrýhanaǵa jetkizilgenin habarlady.
Kazinform úshin arnaıy Anadolu seriktes agenttigi usynǵan.
Japonııanyń Nagano prefektýrasynda 5 baldyq jer silkinisi bolǵanyn jazǵan edik.
