Japonııalyq sot sarapshylary sábılerdi uıyqtatýǵa arnalǵan áýen shyǵardy
ASTANA. KAZINFORM — Sot dálelderi úshin taldaýmen aınalysatyn japondyq ınstıtýt sábılerdi uıyqtatýǵa arnalǵan áýen shyǵaryp, kútpegen jerden ınternette tanymal boldy, dep jazady Kyodo.
«Chıba aýdıokommýnıkatsııalar zerthanasy» kommertsııalyq emes uıymy bul jobany sábılerdiń jylaýynan sharshaǵan ata-analarǵa kómektesý maqsatynda júzege asyrdy. Zerthana qyzmetkerleri bul bastamany sot isterimen aınalysý kezinde ata-analardyń kúızeliske ushyraýy, depressııa jáne júıke aýrýyna shaldyǵýy saldarynan balalarǵa zorlyq-zombylyq kórsetý jaǵdaılaryna tap bolǵannan keıin kóterdi.
Uzaqtyǵy shamamen 14 mınýt bolatyn áýen mýzykalyq qobdısha melodııalary men tynyshtandyratyn dybystardy, sonyń ishinde teńiz tolqyndarynyń shýyn biriktiredi. Jarııalanǵannan keıin eki apta ishinde jazba X áleýmettik jelisinde 3,8 mıllıonnan astam qaralym jınap, zerthananyń saıtyna shamamen 350 myń adam kirgen.
Zerthana júrgizetin dybystyq saraptama kisi óltirý, jol-kólik oqıǵalary, mekteptegi býllıng jáne ata-analardyń kúızelisi men bosanǵannan keıingi depressııasyna baılanysty balalarǵa jasalǵan qatygezdik faktileri sııaqty túrli isterde sot dáleli retinde paıdalanylady.
Zerthana basshysy Mýtsýtosı Mýraoka ata-analarǵa kómektesýdiń jolyn burynnan oılastyryp júrgenin aıtady. Osy kezde teleradıokompanııa oǵan sábılerdi uıyqtatýǵa arnalǵan dybystar jasaýdy usynyp habarlasqan.
— Men aınalysqym kelgen joba dál osy edi, — deıdi ol.
Mýraoka uıqy men dybystarǵa qatysty burynǵy zertteýlerine qaıta oralyp, túrli mýzykalyq aspaptyń únin synaqtan ótkizdi. Sondaı-aq uıyqtap jatqan kezdegi óziniń tynys alýyn jazyp alyp, onyń áserin zerttegen. Nátıjesinde ol smartfon arqyly oınatylatyn mýzykalyq qobdıshanyń joǵary jıilikti dybystary men teńiz tolqynynyń shýyna ári ananyń uıqy kezindegi tynysyna uqsaıtyn «qyzǵylt shýdy» (pink noise) úılestirýge toqtalǵan.
Mýtsýtosı Mýraoka áýenniń negizgi parametrlerin — yrǵaǵy men dybys bıiktiginiń dıapazonyn anyqtap, mýzykany jazýdy zerthana qyzmetkeri Sınsýke Sıbýtanıge tapsyrǵan. Ol bul jumysty nebári úsh kúnde aıaqtap shyqty.
— Men kem degende 30 mınýt demalýǵa muqtaj ata-analar men balabaqsha tárbıeshilerine kómekteskim keledi, — deıdi Mýraoka.
Ol sondaı-aq bul mýzykanyń barlyq sábıge birdeı áser ete bermeıtinin de atap ótti.
Áýendi zerthananyń saıtynan maýsym aıynyń sońyna deıin júktep alýǵa bolady.
Eske sala keteıik, Úndistanda mýzyka daýsynan 140 taýyq qyrylyp qaldy. Fermer dıdjeıdi sotqa berdi.
