Japonııalyq Hıfýmı jáne Ýta Abe taǵy bir rekordty jańartýǵa jaqyndady
ASTANA. KAZINFORM — Japonııalyq aǵaıyndy dzıýdoshylar Hıfýmı jáne Ýta Abe Ázerbaıjan astanasy Baký qalasynda ótip jatqan álem chempıonatynda jeńiske jetip, rekordtyq kórsetkishke jaqyndady.
Dúbirli dodada Hıfýmı Abe (66 keli) fınalda ıspanııalyq Davıd Garsııa Torneni ıppon ádisimen qapy qaldyrsa, Ýta Abe (52 keli) taǵy bir ıspanııalyq balýan Arıaný Toro Solerdiń osal tusyn tapty.
Osylaısha aǵaly-qaryndasty sportshylar óz mansabynda besinshi jáne altynshy márte álem chempıony ataǵyn jeńip aldy. Nátıjesinde olar álem chempıonatynda bes jáne odan kóp márte altyn medal alǵandar qatarynda taǵy bir satyǵa joǵarylady.
Hıfýmı Abe 1997 jyly 9 tamyzda dúnıege kelgen. Qazirge deıin ol 2017, 2018, 2022, 2023, 2026 jyldary bes márte jeńis tuǵyrynan kórinip otyr.
Al 2000 jyldyń 14 shildesinde dúnıege kelgen Ýta altynshy márte chempıondyq ataqqa qol jetkizdi. Dańqty sportshy mundaı bıiktikti 2018, 2019, 2022, 2023, 2025, 2026 jyldary baǵyndyrýǵa múmkindik aldy.
Aıta ketsek, dzıýdodan álem chempıonatynda bes jáne odan kóp márte jeńis tuǵyrynan kóringen alty balýan bar.
Rekordqa jetken sportshylar
Reko Tanı (Tamýra), Japonııa — 7 altyn (1991-2007)
Týn Ven, Qytaı — 7 altyn (2001-2011)
Ingrıd Bergmans, Belgııa — 6 altyn (1980-1989)
Klarıss Agbenený, Frantsııa — 6 altyn (2013-2024).
Endi olardyń qataryna Hıfýmı men Ýta Abe qosyldy.
Aıta ketsek, dzıýdodan álem chempıonatynda Qazaqstan atynan 15 balýan bardy. Ázirge olardyń arasynan Sherzod Davlatov (60 keli) kúmis júldeger atandy.
