Japonııalyq 90 jastaǵy bodıbılder Ispanııada ótken álem chempıonatyna qatysty
ASTANA. KAZINFORM – Japonııalyq bodıbılder Tosısýke Kanadzava 90 jasynda Ispanııanyń Santa-Sýsanna qalasynda ótken IFBB bodıbıldıng jáne fıtnes boıynsha álem chempıonatyna qatysty, dep habarlaıdy BILD basylymy.
Ol 50 jastan asqan sportshylar sanatynda óner kórsetip, ózinen 40 jasqa jýyq kishi qarsylastarymen baq synady. Japonııalyq sportshy júldegerler qataryna qosylmaǵanymen, jasy men fızıkalyq daıyndyǵy kórermenderdiń nazaryn aýdardy.
Kanadzava bodıbıldıngpen 20 jasynda aınalysa bastaǵan. Tórt jyldan keıin «Mıster Japonııa» ataǵyn jeńip alyp, 1967 jyly «Mıster Álem» baıqaýynda óz sanatynda tórtinshi oryn ıelendi.
34 jasynda sporttyq mansabyn aıaqtaǵan ol 50 jasynda qaıta jattyǵýǵa kiristi. Sol kezde et pen balyqtan bas tartyp, vegetarıandyq tamaqtanýǵa kóshti.
Sportqa oralǵannan keıin Kanadzava ardagerler arasyndaǵy ulttyq jarystarda birneshe ret jeńiske jetti. 2026 jylǵy tamyzda 85 jastan asqan sportshylar sanatynda Japonııanyń 19-chempıondyq ataǵyn ıelendi.
Ispanııadaǵy chempıonattan keıin bodıbılder úsh jyldan soń, 93 jasynda, álemdik dodaǵa qaıta qatysýǵa nıetti ekenin málimdedi.
Aıta keteıik, bıyl mamyrda astanalyq 80 jastaǵy marafonshy Saltanat Túıtebaev Keıptaýnda ótken halyqaralyq marafonnyń tolyq qashyqtyǵyn baǵyndyrǵan edi. Al 82 jastaǵy jattyqtyrýshy Aleksandr Tıhovskıı aýyr atletıkamen aınalysyp, ardagerler arasyndaǵy jarystarǵa qatysyp júr.
