Japonııaǵa taǵy da taıfýn jaqyndap keledi
ASTANA. KAZINFORM – Japonııada osy apta sońynda bastalatyn bes kúndik merekelik demalys kezinde taıfýn jaqyndaýy múmkin. Japonııa meteorologııalyq agenttigi sársenbide Tynyq muhıtyndaǵy Marıana araldarynyń mańynda «Dýtszıýan» taıfýnynyń paıda bolǵanyn habarlady. Bul týraly Kyodo agenttigi jazdy.
Maýsymdaǵy 25-shi taıfýn soltústikke qaraı jyljyp, kúsheıýi múmkin. Sınoptıkter onyń Japonııanyń tórt negizgi aralynyń eń irisi Honsıýge jaqyndaýy yqtımal ekenin boljady.
Japonııa ýaqytymen beısenbi tańerteń «Dýtszıýan» taıfýny soltústik-soltústik-shyǵys baǵytynda saǵatyna 20 shaqyrym jyldamdyqpen qozǵalyp jatqan. Onyń ortalyǵyndaǵy atmosferalyq qysym 996 gektopaskal boldy.
Aldaǵy demalys kúnderine qosa, Japonııada kelesi aptada birneshe memlekettik mereke qatarynan atap ótiledi. Demalys kezeńi sársenbi, 23 qyrkúıektegi Kúzgi kún men túnniń teńelý kúnimen aıaqtalady.
Buǵan deıin tamyz aıynda «Delfın» taıfýny Japonııaǵa jetip, 500-den astam reıs toqtatylǵanyn jazdyq.
