Japonııaǵa baratyn azamattar qaýipsizdik maqsatynda aldymen Tokıodaǵy Elshilikpen habarlasqany jón - QR SІM
ASTANA. 28 naýryz. QazAqparat /Rýslan Ǵabbasov/ - Japonııaǵa baratyn azamattar qaýipsizdik maqsatynda aldymen Tokıodaǵy QR Elshiligimen habarlasqany jón.
Bul jaıynda búgin Astanadaǵy brıfıngte Syrtqy ister mınıstrliginiń resmı ókili Asqar Ábdirahmanov málim etti.
«QR Syrtqy ister mınıstrligi jaqyn arada Japonııaǵa sapar jasaýǵa jospary bar otandastarymyzdy ondaǵy qaýipsizdik máselesi jóninde keńes alý úshin Qazaqstannyń Tokıodaǵy Elshiligine aldyn ala habarlasýyn, sondaı-aq barǵannan keıin konsýldyq esepke turýlaryn suraıdy» ,- dedi resmı ókil.
A. Ábdirahmanovtyń sózine qaraǵanda, qazirgi kezde esepke alynǵan 80-ge jýyq Qazaqstan azamaty Japonııa aýmaǵynda qalǵan. Esterińizge sala keteıik, buǵan deıin Japonııadaǵy zilzalaǵa baılanysty elimizdiń birqatar azamattary ushaqpen Qazaqstanǵa qaıtarylǵan bolatyn.
