Japonııadan Qazaqstannyń 69 jáne Qyrǵyzstannyń 16 azamaty Almatyǵa jetkizildi
ASTANA. 15 naýryz. QazAqparat - Búgin tańerteńgi saǵat 8-de bortynda Japonııadan elge qaıtarylǵan 85 azamat bar QR TJM-niń Tý-154 ushaǵy Almaty áýejaıyna qondy.
Bul týraly QazAqparat tilshisine QR Syrtqy ister mınıstrliginiń resmı ókili Asqar Ábdirahmanov málim etti.
«Bortta 85 adam boldy, onyń 16-sy Qyrǵyzstan azamaty», - dedi resmı ókil. Onyń atap ótýinshe, sondaı-aq elge qaıtarylǵan azamattardyń arasynda 12 bala bar.
Budan buryn habarlaǵanymyzdaı, QR Tótenshe jaǵdaılar mınıstrliginiń baspasóz qyzmeti keshe tańerteń Japonııadaǵy qazaqstandyqtardy elge qaıtarý maqsatynda TÝ-154 ushaǵynyń attanyp ketkendigin qýattaǵan edi. Ushaq bortynda jedel kómek kórsetý úshin Medıtsınalyq apat ortalyǵynyń bilikti 2 dárigeri de boldy. Sondaı-aq ushaq qajetti aýyzsýmen jáne azyq-túlikpen jabdyqtaldy.
Al QR Syrtqy ister mınıstrliginiń baspasóz hatshysy Іlııas Omarovtyń atap ótýinshe, elimizdiń Japonııadaǵy Elshiligi adamdardyń tizimin anyqtaý jumysymen aınalysýda.
Esterińizge sala keteıik, 11 naýryzda Japonııada joıqyn jer silkinisi boldy. Qazirgi ýaqytta atalǵan elde 95 qazaqstandyq konsýldyq esepke alynǵan. Jerasty dúmpýleri Tokıoda sezilip, ǵımarattardyń ishinde jıhazdar qulap, tereze shynylary zaqymdanǵan. Jer silkinisiniń qýaty 8,9 baldy quraǵan. Al zilzala oshaǵy 10 shaqyrym tereńdikte ornalasqan.
Keshe, 14 aqpanda Japonııa ókimet oryndary joıqyn jer silkinisi men odan keıingi bolǵan tsýnamı saldarynan 5 myń adamnyń qaza tapqandyǵyn qýattady. Alaıda bul sannyń artýy da múmkin ekendigin aıtý kerek, - dep habarlaıdy RBK agenttigi.
Joǵaryda aıtylǵan tizimge keshe túnde máıitteri Mııagı jaǵalaýynda tabylǵan 2000 adam, sonymen qatar Sendaı qalasynda qaza tapqan 300 adam kiredi.
Bılik myńdaǵan adamdar iz-tússiz joǵalǵandar qatarynda ekendigin aıtýda. Mysalǵa, Mınamısanırıký qalasynda sol jerde turatyn 9000 halyqtyń taǵdyry áli belgisiz.
Burynyraq kem degende osy qalada turatyn 1000 adamnyń opat bolǵandyǵy týraly aıtylǵan edi.
Tabıǵat apatynan zardap shekken barlyq aýdandarda qutqarý operatsııalary jalǵasyp jatyr. Japonııaǵa shet elderden kómek kelýde, Reseı, Frantsııa, AQSh, Ulybrıtanııa elderi óz qutqarýshylaryn jibergen. Qytaı, tipti Aýǵanstan eli kómek qolyn sozýǵa daıyn ekendikterin jetkizgen.
QR SІM baspasóz qyzmetiniń málimetinshe, 11 naýryz kúni Japonııany sharpyǵan surapyl tabıǵı apatqa baılanysty, Qazaqstan Prezıdenti Nursultan Nazarbaev Kúnshyǵys eliniń halqyna kóńil aıtý jedelhatyn joldady. Qazaqstan osynshama qasiretti kezeńde dostas japon halqyna jan-jaqty járdem berýge, onyń ishinde gýmanıtarlyq kómek, qutqarýshylar men ózge de qajetti mamandardy jiberý arqyly qol ushyn berýge daıyn ekendigin bildirdi. Búgingi tańda japon taraby kómektiń naqty mólsheri men túrin aıqyndaýda.
Tokıodaǵy Qazaqstan Elshiligi táýlik boıy jumys istep, Japonııa aýmaǵynda turaqty jáne ýaqytsha turatyn otandastarymyzdyń ornalasqan jerlerin anyqtaýda. Qazirgi kezde zardap shekkenderdiń qatarynda qazaqstandyqtar joq.
