Japonııadaǵy surapyl taıfýn: 800 myńnan astam turǵyn evakýatsııalanady
TOKIO. Kıodo-QazAqparat – Jeksenbi kúni óte qýatty taıfýn Japonııanyń ońtústik-batysyna qaraı jyljýyn jalǵastyrdy, al aýa-raıy agenttigi el turǵyndaryn barynsha abaı bolýǵa úndep jatyr. Bul týraly QazAqparat Kıodo agenttigine silteme jasap habarlaıdy.
Japonııanyń meteorologııalyq agenttigi «Haıshen» taıfýnynyń Okınavaǵa jáne Kagosıma prefektýrasyndaǵy Amamı-Osıma aralyna jaqyndap qalǵany týraly málim etti. Jeksenbiniń keshinen bastap dúısenbi tańyna deıin ol Kıýsıý aralynyń batys jaǵalaýynan soltústikke qaraı yǵysady. Jergilikti turǵyndarǵa nóser jaýyn, jel ekpini, alyp tolqyndar men sý deńgeıiniń kóterilýi kezinde erekshe saqtyq sharalaryn qoldaný týraly eskertý jasaldy.
Órt jáne tabıǵı apattarǵa qarsy kúres jónindegi agenttiktiń aqparatynsha, Okınava, Kagosıma, Kýmamoto jáne Nagasakı prefektýralarynda turyp jatqan 100 myńnan astam otbasynyń 200 myń múshesin evakýatsııalaý týraly buıryqtar men keńester shyǵarylǵan.
Al japon qoǵamdyq teledıdarynyń habarlaýynsha, Japonııanyń ońtústik jáne ońtústik-batysyndaǵy 800 myńnan astam turǵyn jeksenbide jergilikti bılikten sýpertaıfýnnyń jaqyndaýyna baılanysty qaýipsiz jerge shyǵý týraly nusqaýlyq alǵan.
Kyushu Railway Co. kompanııasy dúısenbiden bastap óz poıyzdary men jergilikti poıyz qozǵalysynyń toqtatylǵanyn málimdedi. Al West Japan Railway Co.kompanııasy dúısenbi kúni Hırosıma jáne Hakata stansalary arasyndaǵy Sanyo Shinkansen júrdek poıyzdardyń qozǵalysyn toqtatady.
Jeksenbi kúngi saǵat 13:00-degi jaǵdaı boıynsha, taıfýn ıAkýsıma aralynan 170 shaqyrym jerden soltústik batys aımaqqa caǵatyna shamamen 30 shaqyrym jyldamdyqpen qozǵalyp kele jatyr. Al jeldiń jyldamdyǵy saǵatyna 234 shaqyrymdy qurady.
