Japonııadaǵy kóshkin qurbandarynyń sany 10-ǵa jetti
TOKIO. Kıodo-QazAqparat - Japonııanyń ortalyq bóligindegi Atamı qalasynda 4 shildede bolǵan kóshkin saldarynan kem degende 10 adam qaza tapty, dep habarlaıdy QazAqparat Kıodo agenttigine silteme jasap.
Buǵan deıin toǵyz adamnyń opat bolǵany týraly málim etilgen edi.
Qutqarýshylar eki apta boıy kóshkin ornyndaǵy úıindilerdi tazalaýdy jalǵastyrýda. 18 adam iz-túzsiz joǵalyp ketti.
37 myń halqy bar Atamıdegi kóshkin 4 shildede tańerteń bastaldy. Onyń uzyndyǵy shamamen 2 km, 130-dan astam úı men ǵımarat zaqymdanǵan. Kóshkin Japonııanyń ortalyq jáne shyǵys aımaqtarynda birneshe kúnge sozylǵan nóser jańbyrdyń saldarynan boldy. Eki kúnde keı jerlerde jaýyn-shashyn mólsheri 400-den 600 mm-ge deıin tústi.
