Japonııadaǵy daýyl: 7 mln adam úılerin tastap ketti
NUR-SULTAN. QazAqparat – Japonııada sońǵy on jyldaǵy eń úlken taıfýn saldarynan eki adam qaza taýyp, alpystan astam adam jaraqattandy. Mamandar Tokıoda sońǵy 60 jyldaǵy eń iri daýyl turǵanyn aıtty, dep jazady VVS.
«Hagıbıs taıfýny jergilikti ýaqytpen keshki saǵat 7-de bastaldy. Qazir ol Tokıonyń ońtústik batysynan 225 km / saǵ jyldamdyqpen shyǵysqa qaraı jyljyp barady. Sonyń saldarynan 7 mln-nan astam adam úılerin tastap ketýge májbúr bolǵan», dep jazady avtor.
Japonııanyń kólik mınıstrligi áýejaı men qala ortalyǵynyń arasyndaǵy temir jol jáne avtobýs tasymaly toqtap qalǵandyqtan, eki áýejaıdy ýaqytsha japty. Japonııa áýe kompanııalary eki myńǵa jýyq reısti toqtatty.
Japonııanyń meteorologııalyq agenttigi (JMA) Tokıo aýmaǵynda qatty jańbyr bolatynyn habarlady. «Qalalarda, eldi mekender men aýyldarda qatty jańbyr kesirinen tótenshe jaǵdaı jarııalandy. Kóshkin men sel sekildi dúleı apat ta bolǵan bolýy múmkin», dedi JMA qyzmetkeri. Qatty jaýynnan Japonııada qaýiptiń eń joǵary deńgeıi jarııalandy.
Japonııa bıligi 11 mln adamǵa evakýatsııa jarııalady. Bul 1959 jyldan keıingi eń iri daýyl bolýy múmkin dep boljanýda. 306 km / saǵ jyldamdyqpen bolǵan Vera Taıfýnynan 1959 jyly bes myńnan astam adam qaza tapqan bolatyn.
