Japonııadaǵy anımatsııa stýdııasynan shyqqan órt qurbandarynyń sany 33-ke jetti
KIOTO. KYODO-QazAqparat - Naqty derekter boıynsha, Japonııanyń Kıoto qalasyndaǵy Kyoto Animation Co. anımatsııa stýdııasynan shyqqan órt saldarynan otyz úsh adam qaza tapty, dep habarlaıdy QazAqparat Kıodo Tsýsın agenttigine silteme jasap.
Órtten 33 adam qaza taýyp, 36 adamdy kúıik shalǵan. Zardap shekkender aýrýhanaǵa jetkizildi.
Buǵan deıin belgisiz bireý Kyoto Animation Co. anımatsııalyq stýdııasynda janatyn suıyqtyq tógip, sol jerde jergilikti ýaqyt boıynsha tańǵy saǵat 10:35-te órt bastalǵany habarlanǵan edi. Órt shyqqan kezde úsh qabatty ǵımaratta 70-ke jýyq adam jumys istep jatqan.
Polıtsııa habarlaǵandaı, er adamnyń «Ól!» dep aıqaılap, ǵımaratty jaǵyp jibergenin kórgen kýágerler bar. Sondaı-aq, oqıǵa ornynan pyshaqtar tabylǵan.
Polıtsııanyń deregi boıynsha, jaraqattanyp, aýrýxanaǵa jetkizilgender arasynda 41 jastaǵy er adam órt qoıǵanyn moıyndaǵan.
Japonııada «KyoAni» ataýymen tanymal Kyoto Animation stýdııasy «K-On!» jáne «Harýhı Sýdzýmııa melanxolııasy» (Suzumiya Haruhi no Yuutsu) atty televızııalyq anımatsııalyq xıkaıalardy shyǵarǵan. Kompanııanyń negizi 1981 jyly qalanǵan. Ol jas urpaqqa arnalǵan birqatar anımatsııalyq fılmder túsirgen.
Anımatsııa stýdııasynan shyqqan órt Japonııadaǵy sońǵy jyldardaǵy eń aýyr apattardyń biri sanalady. 2001 jyly tokıolyq Sındzıýký aýdanyndaǵy ǵımarattardyń birinde bolǵan órt saldarynan 44 adam kóz jumǵan edi. 2008 jyly Osakadaǵy vıdeosalonǵa qasaqana qoıylǵan órtten 16 adam qaza tapty.
