Japonııadaǵy joıqyn jer silkinisinen qurban bolǵandar sany 38 adamǵa jetti
ASTANA. KAZINFORM – Japonııanyń Kýmamoto prefektýrasynda 7,1 magnıtýdalyq joıqyn jer silkinisinen qaza tapqandar sany 38 adamǵa jetti. Myńdaǵan turǵyn áli de evakýatsııalyq ortalyqtarda turyp jatyr, dep habarlaıdy Anadoly.
Bul týraly NHK telearnasy prefektýra ákimshiliginiń málimetine súıenip habarlady.
Sońǵy málimet boıynsha, úıindi astynan qutqarylǵan 13 adamnyń jaǵdaıy aýyr. Tabıǵı apat saldarynan 4,6 myńǵa jýyq ǵımarat búlindi. Olardyń qatarynda turǵyn úıler, saýda oryndary jáne óndiristik nysandar bar.
Qazir 46 myńǵa jýyq úı sharýashylyǵy men kásiporyn aýyzsýsyz otyr. 206 evakýatsııalyq ortalyqqa shamamen 8,5 myń adam ornalastyrylǵan. Jer silkinisiniń oshaǵyna jaqyn ornalasqan Ýkı jáne Hıkava aýdandarynda turǵyndarǵa arnap jyljymaly dárethanalar men dýsh kabınalary ornatyldy.
Jergilikti bılik óńirde aptap ystyq saqtalatynyn eskertti. Aýa temperatýrasy 38 gradýsqa deıin kóterilip, turǵyndarǵa kún ótý qaýpine baılanysty saqtyq sharalaryn qatań saqtaý usynyldy.
Jer silkinisinen alty kún ótken soń óńirge barǵan Japonııanyń Premer-mınıstri Sanae Takaıtı evakýatsııalanǵan turǵyndarmen kezdesti. Ol tabıǵı apattan zardap shekken aımaqqa Ózin-ózi qorǵaý kúshteriniń tikushaǵymen baryp, áýeden qıraǵan Aeon saýda ortalyǵy men murjasy qulaǵan Nippon Paper fabrıkasyn kórip shyqty.
Sapar qorytyndysy boıynsha premer-mınıstr jer silkinisin «iri tabıǵı apat» dep jarııalaý josparlanyp otyrǵanyn aıtty. Sondaı-aq onyń saldaryn joıýǵa ortalyq úkimet bıýdjetinen 20 mlrd ıen (shamamen 69,4 mlrd teńge) bólinetinin málimdedi.
Japonııa Mınıstrler kabınetiniń bas hatshysy Kıhara Mınorý da baspasóz máslıhatynda bıliktiń basty maqsaty keltirilgen zalal kólemin jáne evakýatsııa barysyn jan-jaqty baǵalaý ekenin jetkizdi. Onyń aıtýynsha, zardap shekken óńirge kórsetiletin kómek jedeldetiledi.
Japonııada mundaı tabıǵı apattar jıi bolady. El Tynyq muhıtynyń «Otty beldeýi» dep atalatyn, álemdegi eń belsendi seısmıkalyq aımaqtardyń birinde ornalasqan. 2016 jyldyń sáýirinde dál osy Kýmamoto prefektýrasynda bolǵan joıqyn jer silkinisinen 277 adam kóz jumǵan.
Eske salaıyq, 28 shildede Japonııanyń ońtústik-batysyndaǵy Kýmamoto prefektýrasynda magnıtýdasy 7,1 bolatyn jer silkinisi tirkelgen edi. Buǵan deıin tabıǵı apattan qaza tapqandar sany 35 adamǵa jetkeni habarlanǵan bolatyn.
