Japonııadaǵy jer silkinisinen kem degende 30 adam qaza tapty
Japonııadaǵy birneshe jer silkinisinen zardap shekkender sany 30-ǵa jetti. Kazinform bul týraly Kyodo agenttigine silteme jasap habarlaıdy.
Óz kezeginde VVS tolyǵyraq aqparat berip, japon bıligi shyǵyn men qurbandar sany áldeqaıda kóp bolýy múmkin ekeni týraly eskertetinin jazdy. Qaıǵyly oqıǵanyń aýqymy zardap shekken aımaqtarǵa qutqarýshylar jetkende baǵalanady.
Dúısenbi kúni Japonııanyń ortalyq bóliginde Isıkava prefektýrasyndaǵy Noto túbeginde 7,6 baldyq jer silkinisi boldy. Kóptegen ǵımarattar qırap, on myńnan asa adam jaryqsyz qaldy.
Japon úkimetiniń málimetinshe, 97 myńnan astam adam evakýatsııalanyp, túndi shuǵyl evakýatsııa ortalyqtary retinde paıdalanylatyn sport zaldary men mektepterde ótkizdi.
Japonııa premer-mınıstri Fýmıo Kıshıda jer silkinisinen zardap shekken aýdandarǵa baratyn negizgi joldar qatty zaqymdanǵanyn, bul áskerılerdiń qutqarý jumystaryna kedergi keltirgenin aıtty.
«Qutqarý kúshteri apattan zardap shekken aımaqtarǵa jetý úshin kóptegen qıyndyqtarǵa tap bolýda, óıtkeni joldar búlingen, biraq ǵımarattarda qalyp qoıǵan adamdardy ǵımarattar qulamaı turyp, múmkindiginshe tezirek qutqarý kerek», - dedi ol.
