Japonııadaǵy jer silkinisinen qaza tapqandar sany 238-ge jetti

ASTANA.  KAZINFORM — Japonııada Noto túbegine jaqyn jerde bolǵan jer silkinisinen qaza tapqandar sany 238-ge jetti. Bul týraly Isıkava prefektýrasynyń bıligi málimdeme jasady, dep habarlaıdy TASS aqparat agenttigi. 

Buǵan deıin 232 adamnyń qurban bolǵany habarlanǵan bolatyn. Bıliktiń esebine sáıkes, adamdardyń 41%-y aýyr zattardyń janshylýynan, 22%-y tunshyǵýdan, 14%-y gıpotermııadan qaıtys bolǵan. Qaza tapqandardyń 73%-y - 60 jastan asqan adamdar.

Esterińizge sala keteıik, 1 qańtardan beri Japonııada 1,2 myńnan astam jer silkinisi boldy. Bul eldegi sońǵy 3,5 jyldaǵy jerasty dúmpýleriniń jalpy sanynan asyp túsedi.

Apat saldarynan zardap shekkender sany 1,1 myńnan asty. 38,6 myńǵa jýyq úı tolyq nemese ishinara qıraǵan.