Japonııadaǵy jer silkinisi: 3 adam qaza taýyp, 19 adam iz-túzsiz joǵaldy
ASTANA. KAZINFORM – Japonııanyń ońtústigindegi Kýmamoto prefektýrasynda bolǵan kúshti jer silkinisi saldarynan myńdaǵan úı jaryqsyz qaldy, joldar búlindi, keminde 3 adam qaza taýyp, 50 adam jaraqat aldy, dep habarlaıdy BBC.
Túnge qaraı iz-túzsiz joǵalǵandar tiziminde 19 adam qaldy.
Jer silkinisi Kıýsıý aralynyń ishki bóliginde jergilikti ýaqytpen 16:27-de (Grınvıch boıynsha 07:27) boldy. Osyǵan baılanysty 150 myńnan astam adamǵa evakýatsııalaý pýnktterine barý týraly nusqaý berildi. Tsýnamı qaýpi jarııalanǵanymen, kóp uzamaı onyń kúshi joıyldy.
Grınvıch ýaqyty boıynsha saǵat 19:00-degi jaǵdaıǵa sáıkes, 19 adam eki jerde iz-túzsiz joǵalǵandar qatarynda boldy: Kasıma qalashyǵyndaǵy Aeon Mall saýda ortalyǵynda jáne ıAtsýsıro qalasyndaǵy Nippon kompanııasynyń qaǵaz fabrıkasynda.
Kýmamoto prefektýrasynyń tótenshe jaǵdaılardyń saldaryn joıý departamentiniń ókili BBC-ge saýda ortalyǵynyń qırandylary astynan tórt adamnyń qutqarylǵanyn jáne olardyń ómirine qaýip tónip turmaǵanyn aıtty. Alaıda taǵy 10 adam áli tabylǵan joq.
Onyń aıtýynsha, qaǵaz fabrıkasynda eki adam júregi toqtap qalǵan kúıde tabylǵan, al taǵy toǵyz adam áli de iz-túzsiz joǵalǵandar qatarynda.
Kúni boıy japondyq BAQ úıdiń qulaýy saldarynan bir adamnyń qaza tapqanyn habarlady. Sonymen qatar polıtsııa iz-túzsiz joǵalǵandardyń kem degende bir bóligi qaza tapqan kúıde tabylýy múmkin dep qaýiptenip otyrǵanyn jazdy.
Jer silkinisinen keıin kóp uzamaı Tokıodaǵy keńsesinde jýrnalıster aldynda sóılegen Japonııa premer-mınıstri Sanae Takaıtı adam shyǵyny men keltirilgen zalaldyń naqty aýqymy áli baǵalanyp jatqanyn málimdedi.
– Zardap shekkender týraly aqparat kelip jatyr. Keıbir aýdandarda elektr qýaty óship, órt shyqty, sondaı-aq joldar men kópirler zaqymdanyp, ǵımarattar qulady, – dedi Sanae Takaıtı.
Aıta keteıik, buǵan deıin Japonııada bolǵan jer silkinisinen keıin tsýnamı qaýpi jarııalanǵanyn habarlaǵan edi.
Sondaı-aq Tokıoda aptap ystyqtan 260-tan astam adam aýrýhanaǵa túskenin jazdyq.
