Japonııadaǵy telemunarada 20 týrıst lıftide bes saǵattan astam ýaqyt qamalyp qaldy
ASTANA. KAZINFORM — Japonııadaǵy eń bıik telemunara — Tokyo Skytree ǵımaratynda 20 týrıst lıftide bes saǵattan astam ýaqyt qamalyp qaldy. Bul týraly Kyodo News agenttigi jazdy.
Munaranyń resmı saıtyndaǵy málimetke sáıkes, adamdar lıfti ishinde 22 aqpan kúni jergilikti ýaqytpen saǵat 20:15-ten bastap 23 aqpanǵa qaraǵan túni 02:02-ge deıin bolǵan.
Jeksenbi kúni keshki shamamen 20:15-te tórtinshi qabattaǵy kireberis pen 350 metr bıiktiktegi baqylaý alańy arasynda qatynaıtyn eki lıft toqtap qalǵan. Solardyń birinde 20 adam qamalyp qalǵan. Abyroı bolǵanda, zardap shekkender joq. Ekinshi lıft toqtaǵan sátte bos bolǵan.
Oqıǵa kezinde Tokıo qalasynyń Sýmıda aýdanynda ornalasqan bul tanymal týrıstik nysannyń baqylaý alańynda shamamen 1200 adam bolǵan. Lıftilerdiń jumysy qalpyna keltirilgenge deıin olar joǵaryda kútýge májbúr bolyp, keıin tómenge túsirildi.
Munara ákimshiligi dúısenbi kúni nysan tolyq tehnıkalyq tekseris júrgizý úshin jabylatynyn málimdedi.
Eske sala keteıik, Japonııa Parkınson aýrýyn emdeý úshin iPS-jasýshalaryna negizdelgen emdeýdi maquldaǵan alǵashqy el atanǵanyn jazǵan edik.