Japonııadaǵy taıfýn saldarynan mıllıondaǵan adam evakýatsııalandy

ASTANA. KAZINFORM – Keshe, 28 tamyzda Japonııanyń ońtústik-batysyna «Shanshan» taıfýny qatty jel men jańbyr ákelip, elektr júıelerin isten shyǵaryp, áýe qatynasyn shektep, iri zaýyttardy jabýǵa májbúr etti. Mıllıondaǵan adamdar úılerinen kóshirildi. Bul týraly Reuters agenttigi habarlady.

Ázirge keminde úsh adam qaza taýyp, kóptegen adamdar jaralanǵany habarlandy. Sheneýnikter bul aımaqtaǵy eń kúshti daýyldardyń biri bolýy múmkin dep dabyl qaǵýda. Taıfýn Kıýsıý aralynyń ońtústigindegi Mııadzakı qalasynda úılerdiń terezelerin syndyryp, qabyrǵalardy qıratqan.

Jyldamdyǵy sekýndyna 50 metr (saǵatyna 180 km) taıfýn Nagasakı prefektýrasynyń Ýnzen qalasyna kep soqqan. Meteorologııa agenttiginiń málimetinshe, taıfýn soltústikke qaraı saǵatyna 15 shaqyrym jyldamdyqpen jyljýda.

Kyushu Electric Power Co kompanııasynyń málimeti boıynsha, jeti prefektýradaǵy 230 myńǵa jýyq úı sharýashylyqtary jaryqsyz qalǵan.

Mınıstrler kabınetiniń bas hatshysy Esımasa Haıası taıfýnmen baılanysty oqıǵalarda úsh adamnyń qaza tapqanyn jáne bir adamnyń iz-túzsiz joǵalǵanyn, Tabıǵı apattardy basqarý agenttigi 45 adamnyń jaraqat alǵanyn habarlady. El boıynsha 5,2 mıllıonnan astam adam evakýatsııalandy.

Kıýsıýdan keıin taıfýn aldaǵy birneshe kúnde ortalyq jáne shyǵys aımaqtarǵa, sonyń ishinde el astanasy Tokıoǵa jaqyndaıdy dep kútilýde, dep habarlady meteorologııalyq agenttik.

Aqparatqa sáıkes, áýe kompanııalary 800-ge jýyq reısti toqtatqan. Kıýsıý aralynyń kóptegen aýdandarynda poıyzdar, júzdegen avtobýstar men paromdar da toqtatyldy.

Aıta keteıik, buǵan deıin Japonııada «Shanshan» taıfýny jaqyndaýyna baılanysty 230-dan astam reıs toqtatylǵanyn jazǵan edik.