Japonııadaǵy orman órti: myńdaǵan adam úıin tastap ketti

ASTANA. KAZINFORM — Japonııanyń soltústiginde tórtinshi kún qatarynan 1000-nan astam órt sóndirýshi eki iri orman órtimen kúresip jatyr. Ottyń jalyny turǵyn aımaqtarǵa jaqyndap, myńdaǵan adam evakýatsııalandy, dep habarlaıdy ANEWZ.

Órt Ivate prefektýrasynyń Otsýtı qalasynyń mańaıynda tutanǵan, qazirgi tańda tilsiz jaý shamamen 730 gektar jerdi joıyp, sońǵy jyldary elde tirkelgen eń iri orman órtteriniń qataryna endi.

Qyzyl jalyn eń alǵash ret sársenbide taýly jerde tutanǵan, keıinnen oǵan jaqyn mańnan ekinshi órt bastalyp, turǵyn úılerge qaýip tóndire bastady. Bılik 1541 úıdi evakýatsııalaý týraly buıryq shyǵardy, bul shamamen 3200 turǵyndy, ıaǵnı qala halqynyń úshten birin qamtydy.

Quzyrly organdardyń málimetinshe, jergilikti jerdiń kúrdeli relefi, qurǵaq aýa raıy men qatty jel órtti baqylaýǵa alýdy qıyndatýda, sondyqtan órtti sóndirýge kómektesý úshin birneshe prefektýralardan jáne Japonııanyń Qorǵanys kúshterinen tikushaqtar tartyldy.

Qazirgi tańda 8 ǵımarat, sonyń ishinde bir turǵyn úı qıraǵan, biraq qaza tapqandar nemese jaraqat alǵandar týraly habar túsken joq.

Prefektýranyń meri Kozo Hıranonyń aıtýynsha, bılik evakýatsııalanǵandarǵa kómek kórsetý jáne odan ári shyǵyndardyń aldyn alý úshin jumys istep jatqanyn aıtty.

— Men adamdardyń úılerin taǵy da joǵaltýyna jol bermeımin, — dedi ol.

Qazir órt sóndirýshiler men qutqarýshylar joǵary daıyndyq deńgeıin saqtap otyr, tilsiz jaýdy toqtatyp, jaqyn mańdaǵy eldi mekenderdi qorǵaý úshin kúsh salyp jatyr.

Buǵan deıin Soltústik Qazaqstan oblysynda astyq keptirgish órtengeni týraly jazdyq.