Japonııadaǵy lastanǵan «Fýkýsıma» reaktoryna robottar jiberildi

ASTANA. KAZINFORM — Tepco kompanııasy «Fýkýsıma» atom elektr stantsııasynyń reaktorlarynan radıoaktıvti qaldyqtardy shyǵarýǵa daıyndalyp jatyr, dep habarlaıdy DW.

Spot jáne Packbot eki roboty adamdar úshin áli de qaýipti jerlerge enýi kerek. Robottardyń mindeti — reaktorlardaǵy radıatsııa deńgeıin ólshep, barlyǵyn beınege túsirý.

Japondyq BAQ habarlaýynsha, sýretterdi taldaýǵa bir aıǵa jýyq ýaqyt qajet. Terso osy qorytyndylarǵa súıene otyryp ıadrolyq otyn qaldyqtaryn tolyǵymen shyǵarý jolyn sheshedi. Kompanııa buǵan deıin mundaı mashınalardy stantsııanyń ishin zertteý úshin paıdalanǵan. 

Reaktordan qaldyqtardy, sonyń ishinde balqytylǵan otyn syryqtaryn shyǵarý 2011 jylǵy ıadrolyq apattan keıin zaýytty paıdalanýdan shyǵarýdyń uzaq merzimdi protsesiniń eń qıyn kezeńi sanalady. Daıyndyqqa taǵy 12-15 jyl qajet. AES ishinde 880 tonnaǵa jýyq asa qaýipti materıal qaldy, dep jazdy Spiegel.

Eldiń eń iri energııa jetkizýshisi men Japonııa úkimeti AES-ti 2051 jylǵa qaraı tolyq bólshekteý jumystaryn aıaqtaýdy kózdep otyr. Biraq Tepco uzaq daıyndyq jumystary saldarynan buǵan qol jetkizý qıynǵa soǵatynyn málimdedi. 

2011 jyly «Fýkýsıma» AES bıiktigi 15 metrge jýyq tsýnamıden zardap shekti. Salqyndatý júıesi isten shyǵyp, alty reaktordyń úsheýiniń belsendi aımaǵy balqydy. Bul 1986 jyly Chernobyl apatynan keıingi eń aýyr ıadrolyq apat boldy.

2024 jyly «Fýkýsıma-1» atom elektr stantsııasynyń ekinshi energoblogynda radıoaktıvti materıaldarmen lastanǵan 25 tonna sý aǵyp ketti.