Japonııadaǵy qalyń qardan 46 adam qaza tapty

ASTANA. KAZINFORM – Japonııada sońǵy úsh aptada jaýǵan qalyń qar saldarynan 46 adam qaza taýyp, taǵy shamamen 600 adam jaraqat aldy, dep habarlaıdy Kazinform.

Polıtsııa men jergilikti bılik málimetinshe, ólimmen aıaqtalǵan oqıǵalardyń basym bóligi turǵyn úılerdiń shatyrlarynan qulaǵan qar úıindileriniń astynda qalý nemese qar tazalaý kezinde adamdardyń qulap ketýi saldarynan bolǵan.

- Qańtardyń sońynan beri tolastamaǵan qar soltústik óńirlerdegi eldi mekenderdi basyp, ásirese Japon teńizi jaǵalaýynda kólik qozǵalysyn kúrdelendirdi, - dep jazady The Japan Times.

Japonııanyń meteorologııalyq agenttigi derekterine sáıkes, Aomorı qalasy ornalasqan soltústik óńirlik ortalyqta qar jamylǵysynyń qalyńdyǵy 1,3 metrge jetken.

Buǵan deıin Japonııada qýatty qarly borandar saldarynan ondaǵan adamnyń qaza tapqany habarlanǵan bolatyn. Tabıǵı apat 15 prefektýrany qamtyp, eń kóp zardap shekken aýdandarda qar qabatynyń bıiktigi shamamen 2 metrge deıin jetkeni aıtyldy.