Japonııadaǵy Azııa oıyndarynyń sońǵy sporttyq baǵdarlamasy bekitildi

ASTANA. KAZINFORM — Azııa Olımpıadalyq keńesiniń (AOK) Atqarýshy komıteti 2026 jyldyń 19 qyrkúıegi men 4 qazany aralyǵynda Japonııanyń Aıtı jáne Nagoıa qalalarynda ótetin 20-shy Azııa oıyndarynyń sońǵy sporttyq baǵdarlamasyn bekitti.

Ulttyq olımpıada komıteti baspasóz qyzmetiniń málimetinshe, bul sheshim uıymnyń birinshi vıtse-prezıdenti Tımotı Fok tóraǵalyq etken Atqarýshy komıtettiń onlaın otyrysynda biraýyzdan qabyldandy.

— Oıyndar baǵdarlamasyna 68 dıstsıplınany qamtıtyn 41 sport túri kirdi. Sportshylar jalpy 460 medal jıyntyǵyn sarapqa salady. Onyń ishinde erler arasynda — 217, áıelder arasynda — 204 jáne aralas jarystarda — 39 medal jıyntyǵy oınatylady, — delingen habarlamada.

Baǵdarlamaǵa jeńil atletıka, júzý, fýtbol, tennıs sııaqty olımpıadalyq sport túrlerimen qatar, aımaqqa tán nemese jańa dıstsıplınalar da engizildi. Olardyń qatarynda kıbersport, breıkıng, sepaktakraý, ýshý jáne kabaddı bar. Sondaı-aq jarystarǵa boks, dzıýdo, regbı-7, aýyr atletıka, qazirgi bessaıys, semserlesý, skeıtbordıng, eskek esý, jelkendi sport jáne jekpe-jek ónerleri (djıý-djıtsý, kýrash, erejesiz jekpe-jek) sııaqty sport túrleri de endi.

Aıta keteıik, Japonııa Azııa oıyndaryn úshinshi ret qabyldaıdy. Buǵan deıin bul el 1958 jyly (Tokıo) jáne 1994 jyly (Hırosıma) ótken oıyndardyń qojaıyny bolǵan edi.

Buǵan deıin aralas jekpe-jek resmı Azııa oıyndarynyń baǵdarlamasyna engenin jazǵanbyz.