Japonııada zilzaladan kóz jumǵandar sany 65-ke jetti

Japonııanyń ortalyǵynda bolyp jatqan zilzala qurbandarynyń sany 65 adamǵa jetti. Oǵan óńirlik bılik ókilderi jarııalaǵan derekter dálel bolyp otyr. Kazinform bul týraly TASS-qa silteme jasap habarlaıdy.

100-den astam adam túrli jaraqat alǵan.

Qaza tapqandar men jaralanǵandardyń kóbi –toqtamaı jatqan jer silkinisi ortalyǵyna aınalǵan Isıkava prefektýrasy turǵyndary.

Ondaǵan zilzala saldarynan órt tutanyp, 200-den astam turǵyn úı kúlge aınaldy, 100-den astam nysandy jerasty dúmpýi qıratty.

Qutqarýshylar, jedel qyzmet ókilderi men eldiń Qorǵanys kúshi áskeri úıindilerdi jınap, adamdardy izdep jatyr.

Búgin tańnan beri zardap shekken aýdandarda jańbyr toqtamaı tur.

Jýrnalısterge Japonııa mınıstrler kabınetiniń bas hatshysy Esımasa Haıasıdiń habarlaýynsha, qazirgi ýaqytta evakýatsııalyq ortalyqtarda 32,5 myńǵa jýyq adam bar.

Jer silkinisi bastalǵannan keıingi birinshi kúnderi Japonııanyń ortalyq jáne batystaǵy bóliginiń 60 myńnan astam turǵyny úıin tastap ketýge májbúr boldy.

33 myńnan astam úı jaryqsyz otyr, zardap shekken aýdandarda ınternet pen mobıldi baılanys nasharlaǵan. Keı aýyldarda sýmen jabdyqtaý máseleleri týyndady.

Buǵan deıin Japonııanyń ortalyq bóliginde birneshe kúshti jer silkinisi tirkelgenin habarlaǵan bolatynbyz.

Eldiń ulttyq meteorologııalyq basqarmasynyń málimetinshe, Isıkava jáne Nııgata prefektýralary aımaǵynda magnıtýdasy 7,4-ke jetetin jer silkinisi boldy.

Japonııa premer-mınıstri Fýmıo Kıshıda jer silkinisinen zardap shekken aýdandarǵa baratyn negizgi joldar qatty zaqymdanǵanyn, bul áskerılerdiń qutqarý jumysyna kedergi keltirgenin aıtty.

Keshe tabıǵı apat saldarynan keminde 55 adam mert bolǵany habarlanǵan. Isıkava, Nııgata, Fýkýı, Toıama jáne Gıfý prefektýralaryna qatty zaqym keldi.