Japonııada zilzaladan 78 adam qaza taýyp, 51 turǵyn iz-túzsiz joǵalyp ketti
Beısenbi tańdaǵy aqparat boıynsha, Japonııanyń Isıkava prefektýrasy men oǵan jaqyn mańda bolǵan birneshe zilzaladan qaza tapqandar sany 78 adamǵa jetti, óńir bıligi taǵy 51 turǵyn iz-túzsiz joǵalyp ketkenin málim etti. Kazinform bul týraly Sınhýa agenttigine silteme jasap habarlaıdy.
Japonııa premer-mınıstri Fýmıo Kısıda beısenbi jedel áreket etý shtabynyń otyrysynda sheneýnikterdi jer silkinisinen keıingi alǵashqy 72 saǵat ishinde adamdardyń ómirin qutqarý jáne tirshilik etýge qajetti jabdyqtarmen qamtamasyz etý boıynsha kúsh-jigerdi jumyldyrýǵa shaqyrdy. Bul kezeń qutqarýshylar úshin óte mańyzdy, óıtkeni keıinirek tiri qalǵandardy tabý múmkindigi aıtarlyqtaı tómendeıdi.
«Apat bastalǵan sátten 72 saǵat ishinde kóbirek adamnyń ómirin saqtap qalý úshin bar kúshimizdi salyp jumys isteýge shaqyramyn», - dedi premer-mınıstr.
Kóptegen turǵyn burynǵysha jaǵalaýdaǵy Vadzıma qalasyndaǵy úıindi astynda bolýy múmkin. Ol jerde 44 adamnyń ólimi rastaldy, dep habarlady Kıodo Tsýsın. Japonııa Qorǵanys kúshteri kemesi Vadzıma jaǵalaýyna tabıǵat apatynyń saldaryn joıý úshin aýyr tehnıkany jetkizedi.
Beısenbi tańdaǵy jaǵdaı boıynsha avtershoktar serııasy saldarynan Isıkavanyń keı aýdandarynda 95 myńǵa jýyq otbasy sýsyz otyr. Úıindiler men qıraǵan joldar izdeý-qutqarý jumystaryna kedergi keltirip jatyr. Japonııanyń jer, ınfraqurylym, kólik jáne týrızm mınıstrligi Isıkavada 100 ga jerdi zilzaladan keıingi tsýnamı shaıyp ketkenin málim etti. Sý basqan aýmaqtyń kólemi odan da úlken bolýy múmkin.
Japonııalyq qutqarýshylar qıraǵan úılerdiń astynan jer silkinisinen aman qalǵandardy izdep jatyr. Jerasty dúmpýleri olardyń jumysyna kedergi keltirip tur.
Eń kúshti 7,6 baldyq zilzala dúısenbi Isıkava prefektýrasynyń Nota aýdanynda tirkeldi. Jerasty dúmpýi oshaǵy Vadzımadan soltústik-shyǵysqa qaraı 30 shaqyrym jerde ornalasqan. Buǵan deıin Japonııanyń ortalyq bóliginde birneshe kúshti jer silkinisi tirkelgenin habarlaǵan bolatynbyz.
Eldiń ulttyq meteorologııalyq basqarmasynyń málimetinshe, Isıkava jáne Nııgata prefektýralary aımaǵynda magnıtýdasy 7,4-ke jetetin jer silkinisi boldy.
Japonııa premer-mınıstri Fýmıo Kıshıda jer silkinisinen zardap shekken aýdandarǵa baratyn negizgi joldar qatty zaqymdanǵanyn, bul áskerılerdiń qutqarý jumysyna kedergi keltirgenin aıtty.
Keshe tabıǵı apat saldarynan keminde 55 adam mert bolǵany habarlanǵan. Isıkava, Nııgata, Fýkýı, Toıama jáne Gıfý prefektýralaryna qatty zaqym keldi.
