Japonııada júrgen qazaqstandyqtardy elge jappaı qaıtarýdyń qajettiligi joq - SІM ókili
ASTANA. 12 naýryz. QazAqparat /Damır Baımanov/ - Japonııada júrgen qazaqstandyqtardy elge jappaı qaıtarýdyń qajettiligi joq,
dep habarlady búgin QazAqparat tilshisine bergen suhbatynda QR Syrtqy ister mınıstrliginiń resmı ókili Asqar Ábdirahmanov.
«Qazirgi tańda qazaqstandyqtardy jappaı elden áketýdiń qajettiligi joq. Jer silkinisi, meniń oıymsha toqtady, onda qazir apattan keıingi is-sharalar júrgizilýde: zardap shekkender men qurban bolǵandar anyqtalýda. Eger ótinishter jasalyp jatsa, árıne olar qaralady, biraq jeke ótinishter. Jappaı údere qaıtý týraly sóz bolyp otyrǵan joq», - deıdi A.Ábdrahmanov.
Resmı ókil sondaı-aq, zardap shekken qazaqstandyqtar týraly ázirge eshqandaı málimettiń túspegenin jetkizdi.
Juma kúni el tarıhyndaǵy eń qýatty zilzala bolǵan Japonııanyń aýmaǵynda qazirgi tańda 95 qazaqstandyq júr. 8,9 baldyq jer silkinisi úlken tsýnamıge de sebep bolǵanyn buǵan deıin habarlaǵan bolatynbyz. Qurban bolǵandar týraly derekter ártúrli. Buǵan deıin japondyq basylymdar 95 adamnyń mert bolǵanyn habarlasa, juma kúni keshke, Japonııanyń soltústik-shyǵysyndaǵy Sendaı qalasynyń jaǵalaýynda 200-den 300-ge deıin qaza tapqandardyń denesi tabylǵany týraly aqparat túsken.
