Japonııada jylan poıyzdar qozǵalysyn eki saǵatqa toqtatty

ASTANA. KAZINFORM – Japonııadaǵy Tokıo men Osaka arasynda adam eń kóp júretin «Sınkansen» jelisinde júrdek poıyzdar qozǵalysy elektr symdaryna jylan oralyp qalýy saldarynan biraz ýaqytqa toqtap qaldy, dep habarlaıdy VVS.

Uzyndyǵy bir metr jylan elektr taratý jelisine oralyp, ony tuıyqtap alǵan. Habarlamalarǵa sáıkes, baǵanaǵa baýyrymen jorǵalap shyqqan ol symdarmen ótpek bolyp ólgen.

Oqıǵa «Maıbara» men «Gıfý-Hasıma» stansalary arasynda sársenbi kúni keshki saǵat 17 shamasynda bolǵan, dep habarlaıdy Kyodo.

Jolaýshylardyń aıtýynsha, poıyzdarda elektr jaryǵy, onyń ishinde shamdar men kondıtsıonerler jumys istedi, biraq poıyzdardyń ózi júrmegen.

Kyodo jazǵandaı, Tokıo stansalarynyń bılet satatyn avtomattarynda uzyn-sonar kezek paıda bolǵan. Poıyz qozǵalysy keshki saǵat 19.00 shamasynda qalpyna keltirildi. Japonııada birden tórt ulttyq merekeni biriktiretin Altyn apta ótip jatyr, osyǵan baılanysty áýejaılar, vokzaldar jáne basqa da kólik toraptary erekshe kúsheıtilgen rejımde jumys istep keledi.

«Sınkansen» — Japonııada joǵary jyldamdyqty temirjol jelisi. Tokıo men Osaka arasyndaǵy alǵashqy jeli 1964 jyly 1 qazanda Jazǵy Olımpıada oıyndary qarsańynda ashyldy.

Qytaı pandalaryn Japonııadan qaıtaryp alatynyn jazǵan bolatynbyz.