Japonııada zilzaladan keıin úsh kún ótkende úıindi astynan qart ájeı qutqaryldy
Japonııada qutqarýshylar zilzaladan úsh kún ótkende qart áıeldi úıindi astynan alyp shyqty. Vadjıma qalashyǵynda ájeıdi qutqarý kadrlaryn NHK memlekettik jańalyqtar agenttigi taratty, dep habarlaıdy BBC.
Beısenbi kúni Japonııa premer-mınıstri Fýmıo Kısıda qulaǵan ǵımarattardyń qırandysynan 150 adam shyǵarylǵanyn aıtty, qutqarýshylar jumysty jalǵastyryp jatyr.
Aldyn ala málimet boıynsha, epıtsentri Noto túbeginde ornalasqan 7,6 baldyq jer silkinisi kem degende 82 adamnyń ómirin qıdy jáne 330-dan astam adam jaraqat aldy.
Zardap shekken aýdandarda 30 myńnan astam adam áli de arnaıy jabdyqtalǵan baspanada otyr, al keı qalalarda sý, elektr jáne ınternet birde bar, birde joq.
Negizinen Sýzý men Vadjıma qalalarynda kóp adamdar áli kúnge deıin úıleriniń qırandysynyń astynda qalyp otyr.
Qutqarylǵan áıel de jer silkinisinen beri úıindi astynda jatqan.
Onyń qutqarylýy kútpegen ǵajaıyp boldy. Beısenbide 72 saǵatqa sozylatyn múmkindik barynsha azaıdy.
Jer silkinisinen úsh kúnnen keıin tiri qalǵandardy tabý múmkindigi kúrt tómendeı bastaıdy.
Premer-mınıstr Fýmıo Kısıda beısenbide qutqarýshylarǵa bylaı dedi:
«Jaǵdaı óte qıyn, túsinem. Biraq dál búgin keshke, apattan beri 72 saǵat ótkende múmkindiginshe kóp adamnyń ómirin qutqarýǵa bar kúsh-jigerińizdi salýyńyzdy suraımyn».
Japonııada ǵımarattardyń jer silkinisine tózimdiligine jańa talaptar engizilgenge deıin, ıaǵnı 1981 jylǵa deıin salynǵan kóp aǵash úıler qırady.
Qazirgi zamanǵy temirbeton konstrýktsııalary da zardap shekti, olar búkil kóshelerdi basyp qaldy.
Qala turǵyndarynyń keıbiri, negizinen qarttar úıin jańa talapqa saı qalpyna keltire almady, saldarynan 2018 jylǵy málimet boıynsha, qaladaǵy ǵımarattardyń jartysynan kóbi zamanaýı qaýipsizdik standarttaryna sáıkes kelmeıdi.
23 myń halqy bar Vadjıma eles qalaǵa uqsaıdy, óıtkeni turǵyndardyń kóbi tsýnamı jaıly eskertýden keıin qaladan ketip qalǵan. Soǵan qaramastan eń kóp ólim dál osy jerde boldy — osy ýaqytqa deıin 48 jaǵdaı rastaldy.
Degenmen bul kórsetkish áli de artýy múmkin, óıtkeni kóshkin men joldardyń búlinýine baılanysty qala mańymen baılanys úzilgen.
Vadjıma meri Shıgerý Sakagýchıdiń aıtýynsha, ázirge qaladan evakýatsııalanǵan 10 myń turǵynnyń 2 myńy ǵana azyq-túlik pen basqa da gýmanıtarlyq kómek aldy.
13 myń halqy bar kórshiles Sýzý qalasynyń meri Masýhıro Izýmııa bir de bir úı aman qalmaǵanyn aıtty.
Jer silkinisinen bir mınýt ótken soń qalaǵa shaǵyn tsýnamı soqty, úılerdiń 90% tolyǵymen nemese ishinara qırady.
Japonııa — álemdegi eń seısmıkalyq belsendi aımaqtardyń biri jáne Noto túbegindegi seısmıkalyq belsendilik 2020 jyldan beri únemi ósip keledi.
Sońǵy úsh jylda elde 500-den astam shaǵyn jáne ortasha jer silkinisi tirkeldi.
